Türkmen milli konserwatoriýada ylmy-amaly maslahat geçirildi
Maýa Kulyýewa adyndaky Türkmen milli konserwatoriýasynda “Ýörite fortepiano” kafedrasynyň hepdeliginiň çäginde gurnalan “Fortepiano ýerine ýetirijilik ussatlygynyň tehniki kanunlary we täzeçe usullary” atly ylmy-amaly maslahat sazyň syrlaryny giňden açyp görkezdi. Aşgabat şäherinden we welaýatlardan gelen mugallymlaryň hem-de talyp ýaşlaryň gatnaşmagynda geçen bu çäre fortepiano sungatynda täze gözleglere badalga berdi.
Maslahatyň açylyşynda kafedranyň dosenti O. S. Annamyradowa çykyş edip, bu ugruň wajyplygyna ünsi çekdi we diňleýjileri gyzykly ylmy gezelenje ugrukdyrdy.
Kafedranyň professor-mugallymlar düzüminiň taýýarlan çykyşlary saz guralynda çalmagyň inçe tärlerini we häzirki zaman pedagogikasynyň iň täze usullaryny açyp görkezdi. Uly mugallym I. W. Koçkarýowa öz çykyşynda fortepiano ýerine ýetirijiliginiň esasy meseleleriniň biri bolan pedalyň syrlary barada gürrüň berdi. Ol sazandalyk kämilliginiň pedal bilen gös-göni baglylygyny we pedal üstünde işlemegiň aýratynlyklaryny düşündirdi. Türkmenistanyň at gazanan artisti, uly mugallym W. S. Mkrtumow bolsa K. Çerniniň etýudlaryna täzeçe garaýyş hödürläp, olardaky ýerine ýetirijilik ussatlygyny ösdürmek meselelerini orta goýdy.
Kafedra müdiri, uly mugallym M. N. Orazowanyň çykyşy aýratyn gyzykly boldy. Ol ynsanyň fiziologiki gurluşynyň erkin saz çalmak ukyby bilen baglanyşygyny seljerip, barmaklaryň klawiaturadaky hereket erkinliginiň ylmy esaslaryny görkezdi. Uly mugallym E. G. Nuryýewa bolsa poliritmiýany özleşdirmegiň çylşyrymlylygyny ýeňip geçmegiň usullaryny paýlaşyp, eşidiş şablonlarynyň we sözleýiş formulalarynyň bu ugurdaky ähmiýetini beýan etdi.
Şeýle hem çäräniň dowamynda kafedranyň mugallymlary B. S. Muhammedowanyň we A. A. Atajanowanyň çykyşlary diňlenildi.
Bu ýygnanyşyk diňe bir paýtagtymyzyň däl, eýsem ýurdumyzyň dürli künjeklerinden gelen tejribeli we zehinli hünärmenleriň hem başyny bir ýere jemledi. Olaryň hatarynda Balkan welaýat ýörite sungat mekdebinden N. F. Pälwanowa, Daşoguz welaýatynyň M. Garlyýew adyndaky ýörite sungat mekdebinden D. Abdullaýew, Lebap welaýatynyň sungat mekdebinden D. M. Awanesowa, Maýa Kulyýewa adyndaky Türkmen milli konserwatoriýanyň ýanyndaky Daňatar Öwezow adyndaky Türkmen döwlet ýörite sazçylyk mekdebinden Ş. H. Allabaýewa, Arkadag şäherindäki Sahy Jepbarow adyndaky ýörite sungat mekdebinden A. Ýazpoladowa hem-de Ahal welaýatynyň ýörite sungat mekdebinden S. Mämmedow ýaly hünärmenler bar. Maslahata çykyşlary bilen gatnaşan bu myhmanlar ýurdumyzda sazanda-ýerine ýetirijileri terbiýelemekde, sahnadaky tolgunmany ýeňip geçmekde we okuwçylaryň tehniki başarnyklaryny ösdürmekde öz tejribeleri hem-de täzeçe çemeleşmeleri bilen bölüşdiler.
Bu okuw-usuly çäre diňe bir hünär tejribesini alyşmak meýdançasy bolman, eýsem geljekki ussat pianistleriň kemala gelmegine, türkmen fortepiano mekdebiniň has-da kämilleşmegine goşant goşjak uly ädim boldy. Maýa Kulyýewa adyndaky Türkmen milli konserwatoriýasy bolsa özüniň baý däplerini dowam etdirip, innowasion usullaryň ojagy bolup galýar.
Enejan Nuryýewa,
Maýa Kulyýewa adyndaky Türkmen milli konserwatoriýasynyň “Ýörite fortepiano” kafedrasynyň uly mugallymy.
Halk Maslahatynyň Prezidiumy Türkmenistanyň ykdysady ösüş meýilnamasyny ara alyp maslahatlaşdy
18-nji noýabrda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlyklyk etmeginde Türkmenistanyň Halk Maslahatynyň Prezidiumynyň mejlisi geçirildi.
Türkmen halkynyň Milli Lideriniň Halk Maslahatynyň Prezidiumynyň mejlisindäki çykyşy
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Türkmenistanyň Halk Maslahatynyň Prezidiumynyň mejlisindäki çykyşy.
Yslamabatda YHG-nyň Daşary işler ministrleriniň geňeşiniň 30-njy mejlisi geçirildi
16-njy noýabrda Pakistan Yslam Respublikasynyň Yslamabat şäherinde Ykdysady Hyzmatdaşlyk Guramasynyň (YHG) Daşary işler ministrleriniň geňeşiniň 30-njy mejlisi geçirildi. Türkmenistanyň wekiliýetine Ministrler Kabinetiniň Başlygynyň orunbasary, daşary işler ministri Raşid Meredow ýolbaşçylyk etdi. Bu barada Türkmenistanyň daşary syýasat edarasy habar berdi.
Gahryman Arkadag: Türkmenistan ekologiýa taýdan arassa tehnologiýalary giňden ornaşdyrmagy ugur edinýär
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow 11-nji noýabrda Antalýada Birleşen Milletler Guramasynyň Howanyň üýtgemegi baradaky Çarçuwaly konwensiýasyna gatnaşyjy taraplaryň 31-nji maslahatynyň (COP31) Liderler sammitiniň plenar mejlisinde çykyş etdi.
Türkmenistan Er-Riýadda geçiriljek «Ekspo-2030» Bütindünýä sergisine gatnaşjakdygyny tassyklady
Türkmenistanyň Saud Arabystany Patyşalygyndaky ilçisi Muhammetgeldi Aýazowyň «Expo 2030 Riyadh» halkara gatnaşyjylar departamentiniň müdiri, Türkmenistanyň geljekki Bütindünýä sergisindäki ýurt menejeri Muhammed bin Garad bilen duşuşygynda «Ekspo-2030» Bütindünýä sergisine gatnaşmaga taýýarlyk meseleleri ara alnyp maslahatlaşyldy. Bu barada «Türkmenistan: Altyn asyr» neşiri habar berýär.