10-nji iýunda hormatly Prezidentimiz Serdar Berdimuhamedowyň Russiýa Federasiýasyna resmi sapary başlady. Hormatly Prezidentimiziň uçary Moskwanyň «Wnukowo-2» Halkara howa menziline gondy. Bu ýerde belent mertebeli myhmanyň gelmegi mynasybetli Türkmenistanyň hem-de Russiýa Federasiýasynyň Döwlet baýdaklary galdyryldy, Hormat garawuly nyzama düzüldi. Howa menzilinde hormatly Prezidentimiz Serdar Berdimuhamedowy resmi adamlar garşyladylar.

Bu ýerde belent mertebeli myhmany garşylamagyň resmi dabarasy boldy. Hormat garawulynyň serkerdesi dabaraly ýagdaýda hasabat berdi. Türkmenistanyň we Russiýa Federasiýasynyň Döwlet senalary ýerine ýetirildi.

Dabara Moskwa şäherine bir gün ozal gelen ýurdumyzyň Hökümet wekiliýeti hem gatnaşdy.

Dabara hormat garawulynyň esgerleriniň dabaraly ýörişi bilen tamamlanýar. Soňra hormatly Prezidentimiz Serdar Berdimuhamedow howa menzilinden özi üçin ýörite bellenilen kabulhana tarap ugrady.

Ýurdumyz döwlet Garaşsyzlygyny alan ilkinji günlerinden bäri Russiýa Federasiýasy bilen syýasy-diplomatik, söwda-ykdysady we medeni-ynsanperwer gatnaşyklaryň hemmetaraplaýyn pugtalandyrylmagyny daşary syýasatynyň esasy ugurlarynyň hatarynda goýdy.

Häzirki döwürde Türkmenistan we Russiýa Federasiýasy köpasyrlyk dostluk we hoşniýetli goňşuçylyk däplerine ygrarlydyklaryny görkezmek bilen, döwletara gatnaşyklarynyň milli bähbitleriň hem-de durmuş-ykdysady ösüşiň ileri tutulýan ugurlarynyň sazlaşygyna esaslanýan täze görnüşini ýola goýýarlar.

Ikitaraplaýyn hem-de köptaraplaýyn esasda, şol sanda halkara guramalarynyň we abraýly sebit düzümleriniň, ilkinji nobatda bolsa, BMG-niň we GDA-nyň çäklerinde ösdürilýän netijeli syýasy gatnaşyklar Türkmenistanyň we Russiýa Federasiýasynyň ýolbaşçylarynyň ynama we özara hormat goýmaga esaslanýan hyzmatdaşlygyň hemmetaraplaýyn ösdürilmegini maksat edinýändikleriniň hem-de taýýardyklarynyň aýdyň subutnamasydyr. Soňky ýyllarda hyzmatdaşlygyň «Merkezi Aziýa we Russiýa Federasiýasy» görnüşi hem özüniň netijeliligini görkezip, däp bolan söwda-ykdysady we medeni gatnaşyklaryň pugtalandyrylmagyna ýardam berýär.

Bilelikdäki köpýyllyk işleriň netijesinde toplanan üstünlikli tejribe diňe bir özara gyzyklanmalaryň saklanyp galýandygyny däl-de, eýsem, taraplaryň köpugurly hyzmatdaşlygy yzygiderli ösdürmäge berk ygrarlydyklaryny hem görkezýär. Häzirki döwürde bu hyzmatdaşlyga Russiýanyň aýry-aýry sebitleri, onuň iri senagat we medeni merkezleri, şol sanda Tatarystan Respublikasy, Astrahan hem-de Swerdlowsk oblastlary, Russiýanyň demirgazyk paýtagty – Sankt-Peterburg şäheri we beýlekiler goşuldylar.

Mahlasy, soňky ýyllarda özara gatnaşyklaryň netijeli guraly ýola goýuldy hem-de onuň çäklerinde yzygiderli esasda dürli derejelerdäki duşuşyklar, şol sanda ýokary derejedäki gepleşikler, iki ýurduň döwlet düzümleriniň we işewür toparlarynyň wekilleriniň duşuşyklary, işewürlik forumlary, köpsanly medeni çäreler geçirilýär.

Ikitaraplaýyn gatnaşyklaryň işjeňleşdirilmeginde Ykdysady hyzmatdaşlyk boýunça hökümetara türkmen-rus toparyna aýratyn orun berilýär. Bu topar gazanylan ylalaşyklaryň durmuşa geçirilmegine ýardam bermek bilen, dürli ulgamlarda özara bähbitli hyzmatdaşlyk üçin täze ugurlary kesgitleýär hem-de amatly şertleri döredýär. Söwda-ykdysady hem-de ýangyç-energetika, senagat, ulag, aragatnaşyk hem-de telekommunikasiýa, bilim we saglygy goraýyş, öňdebaryjy tehnologiýalar, oba hojalygy we köpsanly beýleki ulgamlar hyzmatdaşlygyň möhüm ugurlarynyň hataryndadyr. Şu ulgamlarda tagallalaryň birleşdirilmegi has netijelidir.

Hormatly Prezidentimiz Serdar Berdimuhamedowyň döwlet Baştutany hökmünde Russiýa Federasiýasyna ilkinji saparynyň iki döwletiň we olaryň doganlyk halklarynyň bähbidine köpugurly, deňhukukly we ýokary derejedäki türkmen-rus gatnaşyklarynyň ösdürilmegine täze itergi berer.

Günüň birinji ýarymynda döwlet Baştutanymyz Uly Kreml köşgüne bardy. Bu ýerde hormatly Prezidentimiz Serdar Berdimuhamedowy Russiýa Federasiýasynyň Prezidenti Wladimir Putin mähirli garşylady.

Türkmenistanyň hem-de Russiýa Federasiýasynyň Baştutanlary birek-birek bilen dostlukly salamlaşyp, iki ýurduň Döwlet baýdaklarynyň öňünde surata düşdüler.

Soňra ýokary derejede ikiçäk görnüşde türkmen-rus gepleşikleri geçirildi.

Gepleşikler tamamlanandan soňra, Russiýa Federasiýasynyň Prezidenti belent mertebeli myhmanyň hormatyna resmi günortanlyk naharyny berdi.

Soňra, uly Kreml Köşgüniň Malahit eýwanynda hormatly Prezidentimiz Serdar Berdimuhamedowy Russiýa Federasiýasynyň döwlet sylagy —«Dostluk» ordeni bilen sylaglamak dabarasy boldy.

Prezident Wladimir Putiniň Permanyna laýyklykda, bu ýokary sylaga döwlet Baştutanymyz iki ýurduň arasynda strategik hyzmatdaşlygyň pugtalandyrylmagyna goşan uly goşandy üçin mynasyp boldy.

Soňra Malahit eýwanynda ikitaraplaýyn resminamalara gol çekmek dabarasy boldy.

Ýygnananlaryň el çarpyşmalary astynda Prezident Serdar Berdimuhamedow hem-de Prezident Wladimir Putin Türkmenistan bilen Russiýa Federasiýasynyň arasynda strategik hyzmatdaşlygy çuňlaşdyrmak baradaky Jarnama gol çekdiler.

Gol çekmek dabarasy tamamlanandan soň, iki döwletiň Baştutanlary köpçülikleýin habar beriş serişdeleriniň wekillerine ýüzlenme bilen çykyş etdiler.

Metbugat maslahaty tamamlanandan soňra, hormatly Prezidentimiz Serdar Berdimuhamedow Kreml diwarynyň ýanyndaky Aleksandrow bagynda ýerleşýän ýadygärlik toplumyna bardy. Döwlet Baştutanymyz 1941-1945-nji ýyllaryň Beýik Watançylyk urşunda faşizm bilen söweşde janlaryny gurban eden gahrymanlara sylag-hormatyň nyşany hökmünde Näbelli esgeriň guburynyň ýanyndaky Baky oduň öňünde gül sebedini goýdy.

Günüň ikinji ýarymynda hormatly Prezidentimiz Serdar Berdimuhamedow resmi saparynyň maksatnamasynyň çäklerinde Döwlet Tretýakow galereýasynyň häzirki döwrüň şekillendiriş sungatynyň eserlerinden düzülen bölümine bardy.

Soňra hormatly Prezidentimiz Serdar Berdimuhamedow geçen asyryň dürli döwürlerinde döredilen hem-de ekspoziýanyň esasyny düzýän sungat eserleri bilen tanyşdy.

Hormatly Prezidentimiz Döwlet Tretýakow galereýasynyň baş direktoryna gezelenç üçin minnetdarlyk bildirip, bu ýerden ugrady.

Döwlet Baştutanymyz Russiýa Federasiýasyna resmi saparyny tamamlap, Moskwanyň «Wnukowo-2» Halkara howa menziline ugrady.

Bu ýerde belent mertebeli myhmany resmi ugratmak dabarasy boldy. Hormat garawulynyň serkerdesiniň hasabatyndan soňra Türkmenistanyň we Russiýa Federasiýasynyň Döwlet senalary ýerine ýetirildi.

Hormatly Prezidentimiz Serdar Berdimuhamedow rus tarapynyň resmi wekilleri bilen mähirli hoşlaşyp, Watanymyza ugrady.