Maýa Kulyýewa adyndaky Türkmen milli konserwatoriýasynda «Konserwatoriýanyň zehinli ýaşlary» atly saz festiwaly geçirýär. Festiwalyň çäklerinde 2022-nji ýylyň noýabr aýynyň dowamynda ýaş sazandalaryň konsert çykyşlary geçirilýär.

Festiwalyň çäklerinde 15-nji noýabrda konserwatoriýanyň konsert zalynda kirişli saz gurallary kafedrasynyň zehinli sazandalary çykyş etdiler.

Konsert maksatnamasynda Halkara bäsleşiginiň laureaty Jennet Hudaýkuliýewanyň sazandarlyk etmeginde Kirişli saz gurallary hünäriniň 4-nji ýyl talyby Annaoraz Döwletow kompozitor D.Şostakowiçiň «Wiolonçel we orkestr üçin konsertiniň» birinji bölümini ýerine ýetirdi.

Halkara bäsleşikleriň diplomanty, ajaýyp konsertmeýster Stella Faramazowanyň sazandarlygynda kirişli saz gurallary kafedrasynyň mugallymy Mähri Suwhanowa kompozitorlar K.Debýussiniň «Aşaýyp agşam» we A.Spendiarowyň «Haýtarma» atly saz eserlerini ýerine ýetirdi. Şeýle-de, Mähri Suwhanowanyň (birinji skripka), Aýjahan Ýagşyýewanyň (ikinji skripka) we Stella Faramazowanyň (fortepiano) ýerine ýetirmeklerinde kompozitor D.Şostakowiçiň «Iki skripka we fortepiano üçin dueti» atly toplumyndan: «Prelýudiýa», «Gawot», «Elegiýa», «Wals», «Polka» sazlary ýaňlandy.

Ussat konsertmeýster Elmira Jumagulyýewanyň sazandarlygynda mugallym Ýusupgeldi Gandymow wiolonçel saz guralynda F.Mendelsonyň «Sonata», B.Asafýewiň «Bahçisaraý suw çüwdürimi» we S.Rahmaninowyň «Elegiýa» atly saz eserlerini ýerine ýetiridi.

Konsert ýaş sazandalaryň amala aşyran uly işleriniň netijelerini, sazandalaryň tehniki mümkinçiliklerini, ýerine ýetirijilik ussatlygyny, olaryň dürli saz akymlaryny we milli kompozitorçylyk mekdepleriniň aýratynlyklaryny juda gowy derejede duýmaklaryny görkezdi. Bu ýerde ýerine ýetiriji sazandalar , sahnada çykyş etmekleri bilen uly tejribe toplamaga mümkinçilik alýarlar. Şeýle konsertleri gelejek ýyllarda hem geçirilip, festiwalyň ajaýyp däp bolmagyny arzuw edýäris.

«Konserwatoriýanyň zehinli ýaşlary» atly saz festiwalyň konsertleri noýabr aýynda dowam edýär, konsertler baradaky maglumatlary bilen konserwatoriýanyň tmk.edu.tm sahypasyndan tanyşyp bilersiňiz.

Jemal AGAJANOWA,

Maýa Kulyýewa adyndaky Türkmen milli konserwatoriýasnyň “Orkestr saz gurallary” fakultetiniň 4-nji ýyl talyby.