Dubaýda Türkmenistanyň nebitgaz pudagyna daşary ýurt maýa goýumlaryny çekmek boýunça halkara maslahat geçiriler
Şu ýylyň 26 — 27-nji aprelinde Dubaý şäheriniň (Birleşen Arap Emirlikleri) «Hyatt Regency» myhmanhanasynda Türkmenistanyň nebitgaz pudagyna daşary ýurt maýa goýumlaryny çekmek boýunça halkara göçme forumy geçiriler.
Hormatly Prezidentimiz Serdar Berdimuhamedow bu maslahatyň ähmiýetini belläp, ýurdumyzyň nebitgaz pudagyna daşary ýurt maýa goýumlaryny çekmekde onuň möhüm ähmiýete eýe boljakdygyny nygtady.
«Türkmengaz», «Türkmennebit» döwlet konsernleri, «Türkmengeologiýa» döwlet korporasiýasy tarapyndan «Türkmen Forum» HJ hem-de Beýik Britaniýanyň «GaffneyCline» kompaniýasy bilen hyzmatdaşlykda guraljak çäräniň gün tertibine möhüm meseleler giriziler. Olaryň hatarynda baý tebigy serişdeleri netijeli ulanmak, energetika bazarlaryny ösdürmek, Hazar deňziniň türkmen böleginiň ýataklaryny özleşdirmek boýunça taslamalara maýa goýumlary çekmek, «Galkynyş» gaz käninde önümçiligi ýokarlandyrmak babatda özara gatnaşyklaryň täze gurallary, ekologik taýdan zyýansyz önümçilikleri ornaşdyrmak, pudaga innowasion tehnologiýalary we nou-haulary çekmek, şeýle hem döwrebap tehnologiýalary we işläp taýýarlamalary ornaşdyrmak işinde öňdebaryjy tejribäni alyşmak ýaly meseleler giriziler.
Iki günüň dowamynda Türkmenistan halkara maslahata gatnaşyjylaryň üns merkezinde bolar, ol öňdebaryjy milli we halkara energetika kompaniýalaryny, şeýle hem diňe Türkmenistanda däl-de, eýsem, tutuş sebitde nebitgaz pudagynyň geljegini gurýan bilermenleri bir ýere jemlär.
Forumyň çäklerinde Türkmenistanyň esasy energetika kompaniýalary ýurdumyzyň baý serişdeler kuwwaty, strategik pudakda daşary ýurtly işewürler üçin döredilýän mümkinçilikler bilen tanyşdyrarlar.
Garaşylyşy ýaly, halkara forumyna gatnaşyjylaryň ünsi 21-nji we 23-nji deňiz bloklaryna, Günbatar Çeleken ýatagyna maýa goýmak, degişli ýataklarda nebitiň we gazyň çykarylyşyny artdyrmak hem-de gaz gorlary boýunça dünýäde ikinji orny eýeleýän «Galkynyş» gaz känini senagat taýdan özleşdirmegiň nobatdaky tapgyryny işläp taýýarlamak ýaly meselelere çekiler.
Işewürlik duşuşyklarynyň dowamynda geljekki maýadarlar ilkinji çeşmelerden Türkmenistanyň energetika pudagynda täze maýa goýum taslamalary barada maglumatlary alyp bilerler.
Forumyň çäklerinde möhüm şertnamalara we özara düşünişmek hakynda ähtnamalara gol çekilmegine garaşylýar.
Bu çäräniň guralmagy Türkmenistanyň energetika pudagyna göni daşary ýurt maýa goýumlaryny çekmek üçin mümkinçilikleri giňeltmäge hem-de bu ulgamy durnukly ösdürmegi ugur edinýän sebit gatnaşyklaryny berkitmäge ýardam eder.
«Zoom» platformasy arkaly çäräniň bolýan ýerinden göni ýaýlymyň guralmagy Dubaýda geçiriljek halkara foruma gatnaşyjylaryň sanyny artdyrmaga mümkinçilik berer. Maslahatyň çäklerinde Türkmenistanyň nebitgaz pudagynyň ýolbaşçylary bilen geçiriljek duşuşyklar oflaýn, şeýle hem onlaýn formatlarda guralar. Umuman, çäräni guraýjylar netijeli işlemek hem-de özara bähbitli hyzmatdaşlygy ýola goýmak üçin ähli şertleri döretmegi maksat edinýärler.
Ozal Londonda, Dubaýda, Abu-Dabide ýokary derejede guralan şeýle halkara çäreler dünýä belli kompaniýalaryň biziň ýurdumyz bilen hyzmatdaşlyga uly gyzyklanma bildirýändigini görkezdi, Diýarymyzyň durnukly we syýasy ýagdaýy, şeýle hem ygtybarly kanunçylyk binýady we döwlet kepillikleri daşary ýurtly işewürleri özüne çekýär.
Ussa USSAÝEW,
«Nebit-gaz» gazetiniň baş redaktory.
Umumymilli foruma taýýarlygyň çäklerinde maslahat geçirildi
Watanymyzyň ösüş ýolunda täze belentliklere tarap ynamly gadam urýan döwründe Garaşsyz, hemişelik Bitarap Türkmenistanda ýurdumyzyň iň ýokary wekilçilikli edarasy bolan Türkmenistanyň Halk Maslahatynyň nobatdaky mejlisine taýýarlyk işleri işjeň ýagdaýda alnyp barylýar.
«Türkmenistanyň nebiti we gazy – OGT 2026» halkara maslahatyna we sergisine taýýarlyk işleri dowam edýär
21–23-nji oktýabrda Aşgabatda «Energiýa. Hyzmatdaşlyk. Ösüş» şygary astynda geçiriljek «Türkmenistanyň nebiti we gazy – OGT 2026» 31-nji halkara maslahatyna we sergisine işjeň taýýarlyk işleri dowam edýär.
Parnik gazlarynyň zyňyndylaryna gözegçilik etmekde okuw sapaklary
Ählumumy metan borçnamasyndan gelip çykýan şertleri ýerine ýetirmek maksady bilen, «Türkmengaz» döwlet konserniniň Ylmy-barlag tebigy gaz institutynyň daş-töweregi goramak bölüminiň gurnamagynda institutyň Maglumat-seljeriş merkezinde parnik gazlarynyň zyňyndylaryna emeli hemra arkaly gözegçilik etmek üçin ösen tehnologiýalara degişli ugurlar boýunça monitoring etmek we olaryň üstünde takyklyga baha bermek, maglumatlary werifikasiýa etmek we başga-da degişli ugurlarda iş alyp barmaklygyň halkara usullaryna degişli wideoaragatnaşyk arkaly onlaýn okuw sapaklary geçirildi.
Gazçylar Garaşsyzlygymyzyň toýuna zähmet üstünlikleri bilen barýarlar
Ýurdumyzda nebitgaz senagatyny döwrebap derejede ösdürmek, tebigy baýlyklarymyzy halkymyzyň we Watanymyzyň bähbidine netijeli peýdalanmak ugrunda giň gerimli işler durmuşa geçirilýär. Bu möhüm wezipeleriň üstünlikli amala aşyrylmagyna «Türkmengaz» döwlet konserniniň «Lebapgazçykaryş» müdirliginiň agzybir işgärleri hem mynasyp goşant goşýarlar.
Türkmen nakgaşynyň eserleri Azerbaýjandaky halkara festiwalynda uly abraýa eýe boldy
29-njy iýul — 3-nji awgust aralygynda Azerbaýjan Respublikasynyň Gabala şäherinde geçirilen «GabalaFest» festiwalynyň çäklerinde «Medeniýetleriň çatrygy» atly ilkinji halkara sungat sergisi guraldy. Dünýäniň 30-dan gowrak döwletiniň sungat ussatlaryny bir ýere jemlän bu taslama suratkeşlik, heýkeltaraşlyk we fotosurat arkaly dürli medeniýetleriň hem-de nesilleriň arasynda çeper dialogy ösdürmäge gönükdirildi.
