Mukaddes Garaşsyzlygyň şanyna nebitgaz toplumynyň aýdymçylarynyň baýramçylyk konserti
“Türkmengaz” Döwlet konserniniň Medeni-işewürlik merkezinde «Nebit-gazly Watanymda ýaňlanýar Garaşsyzlyk, bagtyýarlyk mukamy» atly döredijilik çäresi geçirildi. Türkmenistanyň Garaşsyzlygynyň 32 ýyllygyna bagyşlanan baýramçylyk konsertine nebitgaz toplumynyň belli aýdymçylary we döredijilik topary gatnaşdylar.
Konserte garaşsyzlyk baýramyny täze üstünliklerdir zähmet ýeňişleri bilen garşylaýan türkmenistanlylaryň millionlarçasy ýaly nebitgaz toplumynyň işgärleri çagyryldy.
Baýramçylyk dabarasyny belli şahyr, Türkmenistanyň halk ýazyjysy, Türkmenistanyň Gahrymany Gözel Şagulyýewa açdy. Ol ýygnananlary ýetip gelýän baýramçylyk bilen gutlap, garaşsyz Diýarymyza, şeýle hem nebitgaz pudagynyň işgärleriniň asylly zähmetine bagyşlap ýazan goşgularyny okap bermek bilen olara şygryýet sowgadyny peşgeş etdi.
Türkmenistanyň Gahrymany Gözel Şagulyýewa ýangyç-energetika toplumynyň işgärleriniň öňünde eden çykyşynda hormatly Prezidentimiz Serdar Berdimuhamedowyň hem-de Halk Maslahatynyň Başlygy, türkmen halkynyň milli Lideri Gurbanguly Berdimuhamedowyň ýolbaşçylygynda garaşsyz bitarap Watanymyzda amala aşyrylýan durmuş ugurly syýasat barada durup geçdi. Şonda ol Berkarar döwletiň täze galkynyşy eýýamynda ýaýbaňlandyrylan giň gerimli özgertmelere ýurdumyzyň nebitçileriniň, gazçylarynyň we geologlarynyň goşandyny aýratyn belledi.
Soňra konsert maksatnamasyny açan, uly joşgun bilen ýerine ýetirilen “Eziz watan” atly watançylyk aýdymy zalyň içine ýaň saldy.
Konsert aýdymçylaryň – Türkmenistanyň at gazanan artistleri Döwran Nurýagdyýewiň, Aly Alyýewiň, Şöhrat Saparowiň çykyşlary bilen dowam etdi, olaryň ýerine ýetirmeginde ata Watanymyzy, onuň ajaýyplygyny we berkararlygyny, täze Arkadag şäherini wasp edýän aýdymlar ýaňlandy.
Zehinli artistler – Jumamyrat Gylyjow, Gözel Annamuhammedowa, Gülşirin Öwezmämmedowa, Guwanç Saparow, Göwher Hajymyradowa, Mekan Rejebow tomaşaçylara garaşsyz Watanymyz baradaky aýdymlaryny sowgat etdiler.
“Türkmengaz” Döwlet konserniniň Medeni-işewürlik merkeziniň “Galkynyş” döredijilik toparynyň aýdymçylary döwlet Baştutanymyza alyp barýan parahatçylyk we ählumumy ösüş syýasaty üçin çäksiz hoşallygyň nyşany hökmünde «Arkadagly serdarymyz» atly aýdymyny ýerine ýetirdiler.
Baýramçylyk maksatnamasynyň ahyrynda «Jan watanym Türkmenistan» atly watançylyk aýdymy ýaňlandy.
Gadymy Küştdepdi tansy baýramçylyk çäresiniň jemleýji pursatyna öwrüldi. Ol “Galkynyş” döredijilik toparynyň ýerine ýetirmeginde garaşsyz Diýara, berkarar Watanyň bagtyýarlyk döwrüne bagyşlanan joşgunly waspnama öwrüldi.
SUW ARASSALAÝJYLARYŇ GOŞANDY
Ýurdumyzda uglewodorod çig malynyň çykarylyşynyň artdyrylmagyna «Türkmengaz» döwlet konserniniň iri we öňdebaryjy önümçilik düzümi bolan «Marygazçykaryş» müdirliginiň gazçylary mynasyp goşantlaryny goşýarlar.
SAGDYNLYGYŇ WE RUHUBELENTLIGIŇ NUSGASY
Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan – bedew batly at-myradyň mekany» ýylynda ýurdumyzda bedenterbiýäni we sporty ösdürmek, ýaş nesilleriň arasynda sagdyn durmuş ýörelgesini wagyz etmek döwlet syýasatynyň ileri tutulýan ugurlarynyň birine öwrüldi.
Amyderýa döwlet tebigy goraghanasynda eko-syýahat guraldy
Amyderýa döwlet tebigy goraghanasynda ýaşlaryň gatnaşmagynda iki günlük eko-syýahat çäresi geçirildi. Bu çäre “Ýaş tebigatçy” jemgyýetçilik guramasy tarapyndan, BMG-niň Ösüş Maksatnamasynyň we Global ekologiýa gaznasynyň «Köp sanly bähbitleriň alynmagy üçin Aral deňziniň giňişliginde ýer serişdelerini we ýokary tebigy gymmatlygy bolan ekoulgamlary gorap saklamak we durnukly dolandyrmak» taslamasynyň çäklerinde guraldy.
Bütindünýä saglyk güni mynasybetli ylmy-amaly maslahat geçirildi
Her ýylyň 7-nji aprelinde ýurdumyzda giňden bellenilýän Bütindünýä saglyk güni mynasybetli, Myrat Garryýew adyndaky Türkmenistanyň Döwlet lukmançylyk uniwersitetinde «Ekologiýa abadançylygy — eşretli ertiriň kepili» atly ylmy-amaly maslahat geçirildi.
Türkmenistanyň nebitgaz toplumynda üç aýyň jemlerine garaldy
4-nji aprelde Türkmenistanyň nebitgaz toplumynyň merkezi binasynda «Garaşsyz, baky Bitarap Türkmenistan — bedew batly at-myradyň mekany» ýylynyň geçen üç aýynda ýerine ýetirilen işleriň jemine bagyşlanan hasabat ýygnagy geçirildi.
