«Ahal» topary täze baş tälimçiniň ýolbaşçylygynda üçünji ýeňşini gazandy
«Ahal» toparynyň futbolçylary täze baş tälimçi Döwletmyrat Annaýewiň ýolbaşçylygynda Türkmenistanyň çempionatynyň 12-nji tapgyrynyň myhmançylykdaky oýnunda Türkmenbaşynyň «Şagadamyny» 2:0 hasabynda utup, bassyr üçünji ýeňşini gazandy, diýip «Türkmenistan: Altyn asyr» saýty habar berýär.
Iki pökgi hem oýnuň ikinji ýarymynda tora girizildi. Akmämmet Metdäýew 56-njy minutda hasaby açdy. Gurban Annaýew 88-nji minutda hasaby gutarnykly etdi.
Mundan öň Döwletmyrat Annaýewiň topary 83-nji minutda Akmämmet Metdäýewiň 11 metrlik jerime urgusyny dürs urmagy bilen myhmançylykda Marynyň «Energetigini» 1:0, soňra öz meýdançasynda «Merwi» uly hasap bilen — 5:1 hasabynda ýeňdi. Ýeňijilerden Salim Umarow (11-nji we 77-nji minutlarda), Akmämmet Metdäýew (21-nji), Begenç Mämiýew (90 + 4-nji) we Alibek Abdurahmanow (90 + 6-njy) tapawutlandylar. 78-nji minutda Guwanç Berdimyradowyň meýdançadan çykarylmagy netijesinde azlykda oýnap utulan topardan Ambýar Mahmudow (60-njy) abraý pökgüsini geçirdi.
«Türkmennebitönümleri» Baş müdirliginiň toparynda 43 ýaşly Döwletmyrat Annaýew Serdar Geldiýewiň ýerine geldi, indi ol ýolbaşçylaryň karary bilen «Ahal» FK-da administratiw işleri alyp barar.
Döwletmyrat Annaýew «Ahal» toparyna gelmezden öň 2019-njy ýylda «Köpetdag» bilen birinji ligada üstünlik gazandy, soňra Tofik Şükürowa bu toparda ýokary ligada kömek etdi, «Aşgabat» FK-nyň baş tälimçisi bolup işledi, şeýle hem Iordaniýada geçirilen Aziýa birinjiligine saýlama ýaryşda Türkmenistanyň ýaşlar toparyny (U17) alyp bardy.
«Ahalyň» täze tälimçisiniň öňünde pesinden birinji üçlüge girmek we has gowusy kümüş medal gazanmak wezipesi goýuldy, oňa Welsähet Öwezow, Kemal Gurbanow we derwezebanlaryň tälimçisi Sapar Öwezow dagy kömek edýärler.
«Şagadamdan» üstün çykandan soň, «Ahal» 24 utuk toplap, 12-nji tapgyrda Balkanabatda «Nebitçiden» 4:0 hasabynda üstün çykan we bir oýun az oýnan «Arkadagdan» 6 utuk yza galyp, ikinji orunda barýar. Türkmenistanyň häzirki çempiony bu oýunda dört pökgini hem 26 minutda tora saldy. Şunda Altymyrat Annadurdyýew (3-nji, 9-njy we 26-njy minutlarda), Şamammet Hydyrow (12-nji minutda) tapawutlandylar.
18 utuk toplan «Altyn asyr» we «Merw» toparlary üçünji-dördünji orny paýlaşýarlar. Iki oýun az oýnan «Altyn asyr» 12-nji tapgyra gatnaşmady. 37-nji minutda Söhbet Allanurowyň dürs uran 11 metrlik jerime urgusy bilen «Merw» öz meýdançasyna «Aşgabady» 1:0 hasabynda ýeňdi.
Maryda «Energetik» bilen «Köpetdag» toparlarynyň arasynda geçen başga bir oýunda hasap açylmady - 0:0.
Türkmenistanyň futbol çempionatynyň 13-nji tapgyrynda: «Aşgabat» - «Şagadam», «Köpetdag» - «Merw», «Ahal» - «Arkadag», «Nebitçi» - «Altyn asyr» toparlary duşuşarlar.
Ýangyç-energetika toplumynyň çig mal binýadyny pugtalandyrmakda guwandyryjy zähmet ýeňişleri
«Garaşsyz, baky Bitarap Türkmenistan — bedew batly at-myradyň mekany» ýylynda mukaddes Garaşsyzlygymyzyň şanly 35 ýyllyk toýuna giňden taýýarlyk görülýän günlerde milli ykdysadyýetimiziň beýleki pudaklarynda bolşy ýaly, nebitgaz toplumynda hem guwandyryjy zähmet ýeňişleri gazanylýar.
Türkmenistan kükürtsiz tebigy gazy gözlemek üçin geologiýa-gözleg burawlaýyş işlerini giňeldýär
«Türkmengeologiýa» döwlet korporasiýasy ýurdumyzyň dürli sebitlerinde ýerleşýän birnäçe nebitgazly meýdançalarda kükürtsiz tebigy gazyň gözlegine aýratyn üns berip, giň gerimli geologiýa-gözleg we ulanyş burawlaýyş işlerini alyp barýar. Işler «Türkmenistanyň nebitgaz senagatyny ösdürmegiň 2030-njy ýyla çenli döwür üçin Maksatnamasynyň» çäklerinde amala aşyrylýar.
Umumymilli foruma taýýarlygyň çäklerinde maslahat geçirildi
Watanymyzyň ösüş ýolunda täze belentliklere tarap ynamly gadam urýan döwründe Garaşsyz, hemişelik Bitarap Türkmenistanda ýurdumyzyň iň ýokary wekilçilikli edarasy bolan Türkmenistanyň Halk Maslahatynyň nobatdaky mejlisine taýýarlyk işleri işjeň ýagdaýda alnyp barylýar.
«Türkmenistanyň nebiti we gazy – OGT 2026» halkara maslahatyna we sergisine taýýarlyk işleri dowam edýär
21–23-nji oktýabrda Aşgabatda «Energiýa. Hyzmatdaşlyk. Ösüş» şygary astynda geçiriljek «Türkmenistanyň nebiti we gazy – OGT 2026» 31-nji halkara maslahatyna we sergisine işjeň taýýarlyk işleri dowam edýär.
Parnik gazlarynyň zyňyndylaryna gözegçilik etmekde okuw sapaklary
Ählumumy metan borçnamasyndan gelip çykýan şertleri ýerine ýetirmek maksady bilen, «Türkmengaz» döwlet konserniniň Ylmy-barlag tebigy gaz institutynyň daş-töweregi goramak bölüminiň gurnamagynda institutyň Maglumat-seljeriş merkezinde parnik gazlarynyň zyňyndylaryna emeli hemra arkaly gözegçilik etmek üçin ösen tehnologiýalara degişli ugurlar boýunça monitoring etmek we olaryň üstünde takyklyga baha bermek, maglumatlary werifikasiýa etmek we başga-da degişli ugurlarda iş alyp barmaklygyň halkara usullaryna degişli wideoaragatnaşyk arkaly onlaýn okuw sapaklary geçirildi.
