«Türkmennebit» döwlet konserniniň «Türkmenistanyň nebiti, gazy we mineral serişdeleri» atly jemgyýetçilik-syýasy we ylmy publisistik žurnalynyň täze sany çap edilip, okyjylara gowuşdy.

Neşiriň täze sany žurnalyň jogapkär redaktory Muhammetmyrat Atagarryýewiň «Mukaddes Garaşsyzlyk bagtymyzyň çyragydyr» atly makalasy bilen açylýar. Galamgär makalasynda Türkmenistanyň Garaşsyzlyk döwründe ýeten belent sepgitleri, onuň halkymyzyň ýaşaýyş-durmuş şertlerini gowulandyrmakdaky ägirt uly ähmiýeti hakynda giňişleýin gürrüň berýär.

Halkara nebit we gaz uniwersitetiniň rektory Şahym Abdrahmanowyň, «Türkmengeologiýa» DK-nyň Geologiki maglumatlar merkeziniň baş geology, geologiýa-mineralogiýa ylymlarynyň kandidaty Bazar Çopanowyň, «Türkmengaz» DK-nyň Ylmy-barlag tebigy gaz institutynyň esasy ylmy işgäri, geologiýa-mineralogiýa ylymlarynyň kandidaty Taganguly Ilamanowyň bilelikde taýýarlan «Guýy geofiziki we wertikal seýsmiki barlaglaryň 2D/3D seýsmogözlegleriň maglumatlaryny teswirlemekdäki ähmiýeti» makalasy žurnalyň şu sanyndaky düýpli işleriň biridir. Onda seýsmiki barlaglaryň netijesinde diňe gatlaklary we tektoniki jaýryklary yzarlamak bilen çäklenilmän, eýsem, onuň dogry çemeleşilende seýsmiki gözlegleriň maglumatlaryna görä, ähli ýatak we barlanylýan meýdan boýunça dag jynslaryny häsiýetlendirmek ýaly meseleleri çözmeklige hem mümkinçilik berýändigi seljerilýär.

«Nebit-gaz» gazetiniň baş redaktory Ussa Ussaýewiň «Nebitgaz pudagy sanly ykdysadyýeti durmuşa geçirmekde uly ösüşe eýe bolýar» diýen makalasynda şu günüň möhüm meselesine seredilýär. Awtoryň belleýşi ýaly, «Türkmenistan — Bitaraplygyň mekany» ýylynda ýurdumyzda sanly ykdysadyýeti ösdürmegiň konsepsiýasynyň durmuşa geçirilmeginde nebitgaz pudagynda hem sanly tehnologiýalaryň önümçilige ornaşdyrylmagy barha uly ösüşe eýe bolýar». Bellenilişi ýaly, sanly ykdysadyýeti ösdürmegiň konsepsiýasyna laýyklykda, «Nebit-gaz» gazeti hem elektron görnüşe geçirildi.

Halkara nebit we gaz uniwersitetiniň uly mugallymy Durdy Täjiýew öz makalasynda gaz akdyryş ulgamynyň abatlaýyş işlerinde gazy tygşytlamagyň usullary barada ylmy barlaglaryny beýan edýär. Gazy tygşytlamagyň kämilleşdirilen tehnologik zynjyrynyň şu işde görkezilen 4 görnüşinde hem toplanan gazy hususy harajatlara ulanmagyň ýa-da goşmaça gaz geçirijä bermegiň hasabyna hakyky tygşytlanjak möçberi kesgitlenilýär. Tygşytlanjak gaz hasaplamalaryň yzygiderliliginiň esasynda subut edilýär.

Hormatly Prezidentimiziň tagallasy bilen ýurdumyzda daşky gurşawy goramak meselesine uly üns berilýär. «Türkmennebit» DK-nyň «Nebitgazylmytaslama» institutynyň esasy ylmy işgäri, tehniki ylymlaryň kandidaty Toýnazar Begnazarowyň makalasynda atmosfera edilýän täsirlere baha berilýär. Işde «Gumdagnebit» nebitgaz çykaryş müdirliginde geçirilen ylmy barlagyň netijesinde, kärhananyň nebitgaz çykaryş meýdançalarynda öndürilýän azot okisiniň we metan gazynyň, uglerod okisiniň ýaşaýyş ulgama täsiri derňelýär.

«Türkmengaz» DK-nyň Ylmy-barlag tebigy gaz institutynyň laboratoriýa müdiri Selim Paýtykowyň makalasynda Ýeriň kesigi boýunça ähli gatlaklary, ýer gabygynyň kontinental we umman gatlagynyň gurluşy, ýer gabygyny mantiýa çenli kesýän çuňluk bölünmesiniň zolaklarynyň ýokary nebitgazlylygy bilen tapawutlanyşy seljerilýär.

«Türkmengaz» DK-nyň Ylmy-barlag tebigy gaz institutynyň direktory Baýrammyrat Pirniýazowyň makalasy «Önümli «Şatlyk» gatlagynyň çalyşma zolagynda gaz ýataklaryny gözlemegiň geljegi» diýlip atlandyrylýar. Bu makalada Ylmy-barlag tebigy gaz institutynyň alymlarynyň esaslandyrmasynda hem-de «Türkmengaz» DK-nyň we «Türkmengeologiýa» DK-nyň önümçilik bölümleriniň bilelikdäki alyp baran işleriniň netijesinde Malaý käniniň golaýynda ykdysady taýdan özleşdirmäge amatly kükürtsiz tebigy gazyň täze ýatagynyň açylandygy, berlen teklipler, kükürtsiz gazyň ýokary çykymly akymy alnan gözleg we barlag guýulary, olaryň ulanyş gaznasyna geçirilip, gaz çykaryş müdirliginiň hasabyna berlendigi barada alnyp barlan işler beýan edilýär.

Mahlasy, žurnalyň sahypalarynda alymlaryň, esasy hünärmenleriň, žurnalistleriň pikirleri, ylmy garaýyşlary, derňewleri, maglumatlar bilen tanyşmak bolýar.