Hormatly Prezidentimiz Gurbanguly Berdimuhamedow tarapyndan kabul edilen Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna laýyklykda, söwda we hyzmatlar ulgamynda işleýän hususy kompaniýalar alyjylaryň harytlara elýeterliligini ýeňilleşdirýän internet-söwdanyň möçberini artdyrýarlar, mobil goşundylary döredýärler. Bölek satuw söwda ulgamynda internet-dükanlaryň işlemegi ilata edilýän hyzmatlaryň hilini ýokarlandyrmak bilen, bäsdeşlikli bazar gatnaşyklaryny kemala getirýär.

Soňky birnäçe ýylyň dowamynda ýurdumyzda elektron söwdanyň ösüş depgininiň artandygy görnetin duýulýar. Diňe 2020-nji ýylda onlaýn-söwdanyň möçberi ýurdumyzda üç esseden-de gowrak artdy. Sanly ulgamyň ösmegi diňe bir iri şäherleriň ilatynyň däl, eýsem, ýurdumyzyň dürli künjeklerindäki ýaşaýjylaryň onlaýn-hyzmatlara elýeterliligini üpjün edýär.

Häzir Türkmenistanda iki ýüze golaý at bilen onlaýn-dükanlar we söwda nokatlary hasaba alyndy. 100haryt.com, Ynamdar, Saray.tm, Gerekli, Akat market, Elektronika.tm. we beýlekileri çalt ösýän we gün-günden alyjylaryň arasynda giň meşhurlyga eýe bolýan onlaýn söwda nokatlary hökmünde görkezmek bolar. Munuň birnäçe sebäpleri bar, ýöne olaryň adaty dükanlardan esasy artykmaçlygy, häzirki zaman adamy üçin zerur bolan wagtyň we pul serişdesiniň tygşytlanýanlygyndadyr. Galyberse-de, häzirki wagtda pandemiýa ýokanjyna garşy howpsuzlyk çärelerini berjaý etmek zerurdyr. Onlaýn söwda etmek bilen müşderi belli bir araçägi saklamak kyn bolan köp adamly bazarlara we supermarketlere barmak zerurlygyny aradan aýyrýar. Internet-dükanyndan buýurma müşderiniň gönüden-göni öýüne getirilip, oňa tölegi nagt hem, nagt däl görnüşde-de tölemek bolýar.

Oguljahan ATABAÝEWA,

Magtymguly adyndaky Türkmen döwlet uniwersitetinyň talyby.