Ekeremiň edermen burawlaýjylary
«Türkmennebit» döwlet konserni ýurduň ykdysadyýetinde iri önümçilik-hojalyk toplumy bolup, ol nebitgazly ýataklarda gözleg-barlag işlerini geçirmegi we olary işläp taýýarlamagy alyp barmak bilen, pudagyň ösüşiniň esasy maksatnamalarynyň toplumlaýyn çözgüdini tapmagyna mynasyp goşandyny goşýar.
Arkadagly Serdarymyz döwlet Baştutany wezipesinde işläp başlan ilkinji gününden bäri ýurdumyzyň ýangyç-energetika toplumyny ösdürmek boýunça kabul edýän Kararlarydyr çözgütlerinde, beýleki düzümler bilen bir hatarda, bu konserniň kuwwatyny has-da artdyrmagyň hem-de işini ýokarlandyrmagyň Türkmenistanyň döwlet syýasatynyň ileri tutulýan ugurlarynyň hatarynda durýandygyny aýratyn nygtaýar. Munuň özi konserniň pudaklaýyn düzümleriniň önümçilik wezipelerini yzygiderli ýerine ýetirip, kärhanalaryň maliýe-ykdysady görkezijilerini we düşewüntliligini ýokarlandyrmak wezipesini öňe çykarýar. Şundan ugur alýan konserniň «Nebitgazburawlaýyş» trestiniň buraw işleri müdirlikleriniň hünärmenleri şu günler «Halkyň Arkadagly zamanasy» ýylynyň ruhuna laýyk işleri bitirmek üçin has-da gaýratly zähmet çekýärler.
Tutuş trest boýunça geçen ýedi aýda gazuw işleri tamamlanyp, uglewodorod çig mallaryny çykaryjylara tabşyrylan jemi 20 sany guýynyň 19-synyň ulanyş maksatly guýulardygy hem bu ugurda has belent sepgitlere ynamly gadam urulýandygyndan habar berýär. Şu ýylyň geçen hasabat döwründe «Türkmennebit» döwlet konserni boýunça senagat taýdan özleşdirilýän ýataklardan 2 million 123 müň tonna golaý «gara altynyň», 2 milliard 613 million kubmetre barabar «mawy ýangyjyň» çykarylyp, bellenilen meýilnamalaryň degişlilikde 101,1 göterim we 115,3 göterim berjaý edilmeginde hem burawlaýjylaryň mynasyp paýy bar. Bu ugurda arka atylan ýedi aýda «Ekerem» buraw işleri müdirliginiň hünärmenleri has-da netijeli işler bitirmegi başardylar.
Soňky ýyllarda konserniň buraw işlerini alyp barýan müdirlikleri Germaniýada, ABŞ-da, Hytaýda we Russiýada öndürilen iň täze enjamlardyr desgalara eýe boldular. Ugurdaş kärhanalary bilen birlikde, «Ekerem» buraw işleri müdirliginiň hünärmenleri hem Hytaýdan we Russiýadan satyn alnan täze, has kuwwatly buraw desgalaryny netijeli işletmegiň hötdesinden gelýärler. Bu kämil enjamlardyr kuwwatly buraw desgalarynyň 7000 metre çenli çuňluk geçmäge ukyplydygyny aýratyn nygtamak gerek. Hut şu ýagdaýyň özem miosen gatlaklaryndaky nebitiň täze çuň ýataklaryny açmaga we özleşdirmek üçin elýeter gorlaryň möçberlerini ep-esli giňeltmäge ygtybarly esas döredýär. Bar bolan mümkinçilikleri ýerlikli ulanmagy başarýan bu müdirlikde şu ýylyň geçen ýedi aýynda Günbatar Türkmenistanyň uglewodorod çig mallaryna baý ýataklarynda gazuw işleri üstünlikli amala aşyrylan ulanyş maksatly guýularyň bäşisi önümçiliklere tabşyrylyp, bellenilen meýilnama abraý bilen amal edildi.
— Her bir işe juda oýlanyşykly çemeleşýän Arkadagly Serdarymyzyň türkmen nebitçileriniň öňünde goýýan belent wezipelerine mynasyp iş bilen jogap bermek biziň baş maksadymyz. Berkarar döwletiň täze eýýamynyň Galkynyşy döwrüniň şu ýylynyň geçen ýedi aýynda ýurdumyzyň günbatar sebitindäki Uzynada, Keýmir, Ekerem, Altyguýy, Demirgazyk Goturdepe ýataklarynda gazan guýularymyz ýokary netijeliligi biien tapawutlandy. Uzynadada gazan taslama çuňlugy 6 müň 750 metre barabar bolup, «Gumdagnebit» nebitgaz çykaryş müdirligine tabşyran 77-nji belgili guýymyz her gije-gündizde 91 tonna barabar «gara altyn» we 75 müň kubmetre deň «mawy ýangyç» berýär.
Ýylyň başyndan bäri «Keýmir», «Gamyşlyjanebit», «Goturdepenebit» NGÇ müdirliklerine tabşyran 80-nji, 94-nji, 140-njy we 350-nji belgili ulanyş maksatly guýularymyz hem bu gün uglewodorod çig mallarynyň bol möçberlerini eçilýär. Müdirligimizde bar bolan buraw toparlarynyň jemi 14-siniň 9-sy häzir dürli ýataklarda täze guýularyň gazuw işlerini üstünlikli alyp barýarlar. Galan bäşisi bolsa şu günler täze nebitgazly ojaklara göçürilýär. Öwez Gurbanow, Gurbandurdy Amandurdyýew, Röwşen Garaýew ýaly halypa ussalar tarapyndan ýolbaşçylyk edilýän buraw toparlarymyz bellenen maksatlara ýetjekdigimize ynamymyzy artdyrýar — diýip, «Ekerem» buraw işleri müdirliginiň baş geology Myrat Gurbanberdiýew buýsanç bilen aýdýar.
Hojaberdi BAÝRAMOW,
Ussatnews.com.
Türkmenistanyň nebitgaz toplumy Garaşsyzlygymyzyň 35 ýyllygyny zähmet ýeňişleri bilen garşy alýar
Mukaddes Garaşsyzlygymyzyň şanly 35 ýyllygyna hem-de «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylyň hormatyna Türkmenistanyň Döwlet medeniýet merkeziniň Mukamlar köşgünde ýokary guramaçylyk derejesinde geçirilen dabaraly mejlis medeniýet we sungat işgärlerini, jemgyýetçiligiň wekillerini bir ýere jemläp, ýurdumyzda täze ruhubelentlik we döredijilik badalgalaryny döretdi.
Türkmenistanyň energetika kuwwaty täze derejä çykýar
Türkmenistanyň ýangyç-energetika toplumy milli ykdysadyýetiň düzüminde möhüm orny eýeläp, ykdysady ösüşi üpjün etmek bilen çäklenmän, eýsem, döwletimiziň halkara giňişliginde eýeleýän ornuny pugtalandyrmagyň möhüm guraly bolup durýar. Häzirki döwürde pudagyň ösüşi uzak möhletli durnuklylygy, tehnologik döwrebaplygy we daşary ykdysady gatnaşyklaryň giňeldilmegini ugur edinýän yzygiderli we strategik häsiýete eýe bolýar.
Türkmenistan we Malaýziýa nebitgaz pudagynda strategik hyzmatdaşlygy berkidýärler
19-njy iýunda paýtagtymyzdaky Söwda-senagat edarasynda geçirilen «Türkmenistan — Malaýziýa: nebitgaz pudagynda özara bähbitli hyzmatdaşlyga 30 ýyl» atly halkara ylmy-amaly maslahat hem-de energetika pudagynda iki ýurduň netijeli gatnaşyklarynyň otuz ýyllygyna bagyşlanan sergi türkmen-malaý gatnaşyklarynyň ýokary derejesini hem-de nebitgaz pudagynda hyzmatdaşlygyň strategik häsiýetini dabaralandyrdy.
Owganystanda TOPH gaz geçirijisiniň strategik böleginiň gurluşygy dowam edýär
«Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylda häzirki döwrüň iri halkara energetika taslamalarynyň biri — Türkmenistan — Owganystan — Pakistan —Hindistan (TOPH) gaz geçirijiniň gurluşygy dowam edýär.
Türkmen-hytaý hyzmatdaşlygy pugtalanýar
«Garaşsyz, baky Bitarap Türkmenistan — bedew batly at-myradyň mekany» diýlip yglan edilen 2026-njy ýylyň 17-nji aprelinde Gahryman Arkadagymyzyň, Arkadagly Gahryman Serdarymyzyň tagallalary esasynda, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de Hytaý Halk Respublikasynyň Döwlet Geňeşiniň Premýeriniň birinji orunbasary Din Sýuesýanyň Mary welaýatynyň Ýolöten etrabynyň çäginde «Galkynyş» gaz känini özleşdirmegiň dördünji tapgyrynyň gurluşyk işlerine badalga beren güni berkarar Watanymyzyň täze taryhyna altyn harplar bilen ýazyldy.
