Aýdym-sazy bilen ynsan kalbyna şatlyk paýlaýan Mekan NARGULYÝEW

14:02 10.03.2021

https://ussatnews.com/storage/posts/870/original-160488b38d1aa7.jpeg

Halkymyz «Ile döwlet geler bolsa, bagşy bilen ozan geler» diýip, aýdym-saz, sungat ussatlaryna uly hormat goýýar. Garaşsyz Watanymyzda bagşy-sazandalar ajaýyp aýdymlarynda eziz Diýarymyzy, Gahryman Arkadagly bagtyýar döwrümizi wasp edýärler. Şeýle aýdymçylaryň biri hem Türkmenistanyň nebitgaz toplumynyň Medeni-işewürlik merkeziniň aýdymçysy Mekan Nargulyýewdir. Onuň «Arkadag», «Nurana aý», «Ene ýüregi», «Ilsoltan» ýaly aýdymlary il içinde uly höwes bilen diňlenilýär. Biz hem zehinli aýdymçy bilen ussatnews.com elektron gazetiniň okyjylary üçin söhbetdeşlik guradyk.

— Mekan söhbedimiziň başyny aýdym-saz sungatyna gelşiňiz baradaky gürrüň bilen başlaýalyň!

— Baş üstüne! Men Ahal welaýatynyň Babadaýhan etrabynda doglup, Ak bugdaý etrabynyň Parahat daýhan birleşigindäki 12-nji orta mekdebi tamamladym. Çagalykdan halypalaryň aýdymlaryny diňlemegi halardym. Ejemiň daýysy Girman bagşynyň aýdymlaryny gulaga öwrülip diňleýärdim. Kakamyň dogany, sazanda Geldi Ataýewiň sazlarynyň aşygydym. Aýdym-saz dünýäsine imrinmegime deň-duşlarym Guwanç Baýramowdyr Röwşen Berdiýewiň hem uly yhlasy bar. Olar meniň aýdymçy bolup ýetişmegime ynam bildirdiler. Şeýdibem bu sungatyň syrly dünýäsine imrinip gitdim.

— Aýdym-saz sungatynda halypalaryň ýoly ýaşlara uly mekdep bolup durýar.

— Hawa, dogry bellediňiz. Halypam Kakadurdy aga şeýle diýipdi: «Halypamyz Öwezgeldi Tekäýewiň aýdymlaryny ýerine ýetirenimde özüm bolmaga — Kakadurdy bolmaga çalyşdym. Inim, sen şu wagt «Ilsoltan» aýdymyny ýerine ýetirdiň. Bu aýdym meniň ýerine ýetiren aýdymym bolsa-da, sen ony Kakadurdy bolup däl-de, Mekan bolup aýtdyň. Şeýdilende täze şaha ösüp, boý alýar».

— Ine, şol şahadanam halypa-şägirtlik ýoly dowam edýär-dä.

— Hawa, şägirt halypasynyň iň kiçijik hereketinem, aýdym aýdyş tilsiminem ünsden düşürmeli däl. Halypalarymyzyň bize bildirýän ynamyny ödemekde öz başarnygymy gaýgyrmaryn.

— Her bir aýdymçynyň öz ýoly, äheňi bolýar.

— Dogry bellediňiz. Türkmenistanyň halk artisti, halypam Kakadurdy Täjimowyň, Jumamyrat Gylyjowyň aýdym aýdyş äheňinde aýtmaga çalyşýan. Halypalarymyň döreden aýdymlarynyň owadan dünýäsine özümi atýaryn-da, şirin owazlara maýyl bolýan. Olaryň öwüt-ündewlerini diňläp has-da kämilleşýän.

— Mekan, gowy görüp diňleýän aýdymçylaryňyz kimler?

— Halypa bagşylarymyzdan Öwezgeldi Tekäýewiň, Atabaý Çarygulyýewiň aýdymlaryny lezzet alyp diňleýän.

— Medeni-işewürlik merkezindäki işleriňiz dogrusyndaky söhbet bilen gürrüňimizi dowam edäýeliň!

— Watanymyzyň toý-baýramlar bilen joşýan günlerinde il-günümiziň köňlüne şatlyk paýlamak üçin biz hem sungat işgärleri bolup, öz goşandymyzy goşýarys. Ýurdumyzyň dürli welaýatlarynda döredijilik saparynda bolup, nebitgaz ulgamynda zähmet çekýän nebitçilerimiziň we gazçylarymyzyň armasyny ýetirip, Watanymyzy wasp edýän aýdymdyr sazlarymyz bilen çykyş edýäris.

— Diňleýjileriň ynamyny gazanmak üçin näme etmeli?

— Halkyň içinde bolmaly, aýdymlaryň, owazyň bilen olaryň ýüreginden, kalbyndan ýer almaly. Ony gazanmak üçin hem irginsiz işlemeli bolýar.

— Üstünlige nähili garaýarsyňyz?

— Hemişe öwrenip gezmek üstünlige eltýän ýoldur. Şonuň üçinem elmydama halypalary diňläp, olardan näme-de bolsa bir zat öwrenmegi maksat edinýän. Men ozal belli halypalardan: «Üstünlik togsan dokuz göterim zähmetden, bir göterim hem zehinden durýar» diýip eşidipdim. Şu aýtgyny özüme ýol-ýörelge edinýän.

— Boş wagtyňyz näme bilen meşgullanýaňyz?

— Ir säherde açyk howada gezim etmegi halaýan. Şeýle-de welosiped sürmekden lezzet alýan. Tarda, gitarada saz çalyp, aýdyma hiňlenmek ylhamyma ylham goşýar.

— Mekan, sungat adamsyna kämilleşmek üçin maşgalanyň goldawy zerur bolsa gerek?!

— Elbetde. Her bir gazanýan üstünligimde ejemdir kakamyň mynasyp paýy bar. Bagtly, döwletli, agzybir maşgalamyzda 5 dogan — 2 oglan, 3 gyz bolup ulaldyk. Meniň aýdymlarymyň ilkinji diňleýjileri maşgala agzalarym.

— Geljekde öňde goýýan maksadyň barada aýdaýsaň!

— Aýdym-saz ynsan kalbyna şatlyk paýlaýar. Bagtyýar ýurdumyzyň bedew batly ösüşlerini ajaýyp aýdymlarym bilen wasp etmek baş maksadym. Biz — bagtyýar ýaşlar Gahryman Arkadagymyzyň saýasynda ähli arzuwlaryň hasyl bolýan bagtly döwründe ýaşaýarys. Milli Liderimiziň baştutanlygynda ýurdumyzyň toýlary toýa ulaşýar. Goý, hormatly Prezidentimiziň jany sag, il-ýurt bähbitli ähli tutumlary rowaç bolsun!

— Söhbetdeşligiňiz üçin köp sag boluň! Maksatlaryňyz myrat tapsyn! Abadan, asuda Watanymyzda hormatly Prezidentimiziň, eziz Watanymyzyň waspyny ýetirýän aýdymlaryňyz hemişe ýaňlansyn dursun!

— Sag boluň.

Ýazgül ANNAÝEWA,

            USSAT NEWS.

Başga makalalar
165f9d3ed4c5c0.jpeg
Eserleri — ruhy hazyna

Magtymguly Pyragy türkmeniň ruhy sütünleriniň biridir. Akyldaryň döwredijiligi halkymyzyň durmuşynda we terbiýe mekdebinde mynasyp orun eýeleýär.


165f44c5a3a8f1.jpeg
Gaz akdyryjylaryň rowaçly gadamlary

«Türkmengaz» döwlet konserniniň «Türkmengazakdyryş» birleşiginiň «Daşoguzgazakdyryş» müdirliginiň gazçylary «Döwletabat — Derýalyk» ugry boýunça türkmen gazynyň dünýä bazaryna çykarylmagy ugrunda hem-de ýurdumyzyň demirgazyk welaýatynyň ilatynyň gymmatly «mawy ýangyç» bilen ýokary derejede üpjün edilmegi babatda nusgalyk işleri alyp barýarlar.


165dc6a2670a92.jpeg
Türkmenistanda habar beriş serişdeleriniň sanlylaşdyrylmagy täze mümkinçilikleri açýar

Ählumumy sanlylaşdyrma we internet asyry täze habar beriş serişdeleriniň döremegi üçin mümkinçilikleri açmak bilen çäklenmän, eýsem, sanly ulgamdan peýdalanýan okyjylaryň täze neslini kemala getirdi. Olar üçin maglumatlaryň esasy çeşmesi bolup metbugat sahypasy däl-de, kompýuteriň, planşetiň ýa-da smartfonyň multimedia ekrany hyzmat edýär.

165c31806f1f62.jpeg
Magtymguly Pyragynyň kanoniki portretiniň döreýşi

Döwlet şekillendiriş sungaty muzeýiniň zallarynyň birini Türkmenistanyň halk suratkeşi Aýhan Hajyýewiň döreden beýik şahyrymyz Magtymguly Pyragynyň kanoniki portreti bezeýär. Bu portret Magtymgulynyň keşbiniň hut şeýle bolandygyna ynamymyzy berkitdi. Ýogsa, eseriň döredilen wagty suratkeş bary-ýogy 23 ýaşynda eken, ol şonda-da fotosuraty bolmadyk şahyryň keşbini şekillendirmäge ýaýdanmandyr. A.Hajyýewiň ýerine ýetirmeginde Magtymgulynyň asyl keşbiniň emele gelşine düşünmek üçin bu eseriň döreýşiniň taryhyny ýatlamagy makul bildik.


165953ddc0ebdf.jpeg
Sergeý Lazarew joşgunly türkmen tomaşaçysynyň öňünde dyza çökdi (Arhiwdan 2014 ýyl)

Rus estradasynyň ýyldyzy Sergeý Lazarewiň Sportuň gyşky görnüşleri boýunça sport toplumynda guralan çykyşy diýseň uly şowhun döredip, tomaşaçylaryň müňlerçesinde gyzyklanma döretdi.