Oglanjyk ir bilen ukudan oýandy-da, otagynyň töründe bezelgi duran arçanyň ýanyna baryp töweregine seretdi. Eglip bir bölek kagyzy aldy-da: «Aýazbaba meniň ýazan hatymy okamandyr-a» diýip, başyny aşak saldy. Birdenem:

— Ene, ene — diýip gygyrdy.

Öýde özünden başga adam bolmansoň, oňa jogap beren bolmady. Onsoň ol beýleki otaglara aýlanyp çykdy. Soňra penjireden seretdi. Enesiniň howluda ysmanak ýuwup oturanyny görüp daş çykdy. Sona daýza agtygyny görenden:

— Oglum, aman-sag ördüňmi? — diýip, habar gatdy.

— Hawa — diýip, agtygy nägilelik bilen jogap berdi.

Enesi:

— Näme keýpiň ýok, oglum?

— Ene, men howlymyzyň derwezesini gulplaman goýaý diýdim-ä. Aýazbaba öýümize girip bilmän, ýazan hatymy okamandyr-a — diýip, elindäki haty Sona ejä uzatdy. Sona eje:

— Hany, okap göreýin, balam — diýip, elindäki tabagyny ýerde goýup, haty okady. Soňra-da ol: «Entek Täze ýyl baýramçylygy iki hepdeläp dowam edýär. Aýlanmaly ýerleri kän bolup eli degen däldir. Aýazbaba hökman geler, oglum. Bar, sen öýe gir-de, ertirligiňi edin! — diýip, agtygyny öýe ugratdy. Özi bolsa egnindäki ýeňsiziniň jübüsinden el telefonyny çykaryp, agtygyndan ogrynça ogluna jaň etdi: «Meret jan, oglum! Işläp otyrmyň sag-aman. Begenç jan:

«Aýazbaba gelmedi öýümize. Ýazan hatymam okamandyr» diýip, nägile bolup otyr. Hatynda ýazanam dürli galam, reňkli kagyz hemem plastilin. Indi özüň bir alajyny tap-da, begendir ogluňy — diýip, jaňyny goýdy.

Soňra ol öýe girip, sagada seretdi-de:

— Begenç jan, derrew kömekleş, guzym. Ejeň-kakaň geler wagty golaýlady — diýip, saçak ýazmaga başlady. Biraz wagtdan howluda hümür-hümür ses eşidildi. Begenç ylgap, äpişgeden seretdi. Ol:

— Ene-e, kakam dagy bilen öýümize Aýazbaba gelýä, oňa seret.

— Hä, şeýlemi? Men aýtdym-a Aýazbaba hökman geler — diýip. Bolaýypdyr, oglum.

Şol wagt gapy açylýar. Oglanjygyň kakasy gapydan girişine:

— Oglum, görmändirisem, yzymyzdan Aýazbaba gelýän eken-ä — diýenden Aýazbaba:

— Begenç jany gutlamasak bolmaz-a. Düýn agşam geljekdim, ýöne uly arçalaryň ýanyndaky çagalaryň goşgularyny diňläp gijä galdym. Ondan soňam Begenç jany ukudan oýarmaýyn diýip şu güne galdym. Oglum, hatyňda dürli galam, reňkli kagyz, plastilin sargapsyň, alyp geldim — diýenden Begenç:

— Aýazbaba ýazan hatym açylmandyr-a. Nädip okap ýetişdiňiz? — diýip, bilesigelijilik bilen sowal berdi.

— Wiý, oglum, aýdýanyň näme? Jadyly taýagymy tyrkyldatdygym derrew okap bilýän. Ýogsa men seniň ýaly munça köp çagalaryň ählisiniň ýazan hatyny okap ýetişmen-ä. Maňa jadyly taýagym kömek edýär — diýip düşündirdi. Bezelen arçanyň ýanynda durup Begenjiň aýdyp beren goşgusyny, aýdymyny diňledi. Sowgadyny berdi.

— Sag bol, Aýazbaba! diýip, Begenç şeýle bir begendi.

Akgül SAPAROWA,

Ussatnews.com.