Çagalykdan aýdym-sazyň dünýäsine aralaşan Täşli TULEGENOW

23:43 03.04.2021

https://ussatnews.com/storage/posts/998/original-16068b739e9c62.jpeg

Çagalykdan aýdym-sazyň dünýäsine aralaşan, ajaýyp owazy bilen ýaşlaryň söýgüsini gazanan aýdymçy ýigitleriň biri hem Türkmen döwlet medeniýet institutynyň talyby Täşli Tulegenowdyr. Onuň «Bibi», «Sonam geldimi», «Bäri gel, bäri», «Ýagma, bulut», «Arabyň gyzy» ýaly aýdymlaryny diňleýjiler uly höwes bilen diňleýärler.

Ussatnews.com elektron gazetiniň okyjylarynyň islegini nazarda tutup, aýdymçy ýigit bilen söhbetdeş bolmagy müwessa bildik.

— Täşli, söhbedimizi sungat älemindäki ilkinji ädimleriňiz hakda berjek gürrüňleriňiz bilen başlaýalyň!

— Men Balkan welaýatynyň Balkanabat şäherinde eneden doglup, şol ýerdäki 16-njy orta mekdebi tamamladym. Aýdym-saza bolan höwes çagalyk ýyllarymda döredi. Heniz bäş ýaşymdakam, aýdym aýdardym. Biz maşgalada üç dogan bolup ulaldyk. Balkanabat nebitçilik orta hünär okuw mekdebini tamamladym. Şu günki günde bagtyýar döwrüň bagtly talyby. Ejemdir kakam bolsa sungata sarpa goýýan adamlar.

— Diýmek, maşgalaňyzdakylaryň hemmesi hem aýdym-sazyň aşygy-da...

— Hawa, onda-da halk aýdymlarynyň aşygy.

Türkmeniň bagşyçylyk sungatynda birnäçe ýollar bar. Siz «Çopan ýolundan» aýdym aýdýarsyňyz. Bu ýoluň tapawudy barada gürrüň beräýseňiz!

— Bagşyçylyk sungatynda «Çopan ýoly» şahandazlyga, degişmä baý. Menem halypalar Nurberdi Gulowyň, Rejepguly Kerimowyň bu ýoluny dowam etdirmek üçin uly yhlas edýärin. «Çopan ýoluny» dutardan estrada geçiren halypam Rejepguly Kerimowdyr.

— Täşli, ilkinji ýerine ýetiren aýdymyňyz ýadyňyzdadyr-la!

— Hawa, ilkinji gezek «Aýjemal» diýen aýdymy ýerine ýetiripdim.

Aýdym-saz sungatynda halypaňyz...

— Sungat adamlary duýguçyl bolýar. Kiçiligimden halypa bagşylary ürç edip diňleýärdim. Aýdym aýdyp duran pursadym täsin hereketleri hem ýerine ýetirýärdim. Şonda halypam, Türkmenistanyň halk artisti Jemal Saparowanyň ünsünden sypmandyr. Halypamyň talapkär, synçy nazaryndan bolsa inçejik hereket hem sypmaýar. Öz zehinimiň üstünde irginsizlik bilen işlemelidigimi halypam hemişe sargaýar.

— Üstünlige ýetmegiň syry nämede?

— Üstünlige ýetmek üçin ýeterlik taýýarlyk, özüňe bolan ynam gerek. Yhlasyň, ynamyň bar ýerinde ýetilmejek menzil ýokdur.

— Siziň ylham çeşmäňiz nämede?

— Diňleýjilerim, durmuş pursatlary, halypalarym. Watanymyzyň ösüşleri, gözelligi her bir ynsana ylham berýär.

— Durmuşyňyzda bolup geçen bagtly pursatlary ýatlap geçäýseňiz!

— Durmuşymda bagtly pursatlaryň biri talyp bolan günüm. Kaka bolup, perzentlerimiň dünýä inen güni iň bagtly pursadym boldy. 2000-nji ýylda bolsa «Garaşsyzlygyň merjen däneleri» atly döredijilik bäsleşiginde ýeňiji boldum. Şeýle-de, 2001-nji ýylda Gulbaba adyndaky Çagalar baýragyna mynasyp boldum.

— Okyjylarymyzy maşgala durmuşyňyz hem gyzyklandyrýan bolsa gerek!

— Bagtly, döwletli, agzybir maşgalamda gelnim Gyzylgül bilen bagtyýar döwrümize buýsanyp ýaşaýarys. Gyzymyz Feride, oglumyz Mukam biziň göz-guwanjymyz. Her bir gazanýan üstünligimde olaryň hem mynasyp paýy bar.

— Söhbetdeşligimiziň ahyrynda okyjylarymyza ýürek arzuwlaryňyzy hem aýdaýsaňyz?!

— Ajaýyp zamanamyzda, döwletli-döwranly döwrümizde medeniýete, sungata uly üns berilýär. Nesip bolsa, geljekde türkmen aýdym-saz sungatynyň ösmegine öz goşandymy goşaryn.

Bagtyýar döwrümizde ata Watanymyzda aýdym-sazyň owazy belentden ýaňlansyn! Sungatyň Hak howandary Gahryman Arkadagymyzyň jany sag, il-ýurt bähbitli ähli tutumlary rowaç bolsun!

— Täşli, beren gyzykly gürrüňleriňiz üçin köp sag boluň! Goý, mundan beýläk-de aýdym-saz äleminde size döredijilik üstünlikleri ýar bolsun!

Ýazgül ANNAÝEWA,

             USSAT NEWS.

Başga makalalar
165f9d3ed4c5c0.jpeg
Eserleri — ruhy hazyna

Magtymguly Pyragy türkmeniň ruhy sütünleriniň biridir. Akyldaryň döwredijiligi halkymyzyň durmuşynda we terbiýe mekdebinde mynasyp orun eýeleýär.


165f44c5a3a8f1.jpeg
Gaz akdyryjylaryň rowaçly gadamlary

«Türkmengaz» döwlet konserniniň «Türkmengazakdyryş» birleşiginiň «Daşoguzgazakdyryş» müdirliginiň gazçylary «Döwletabat — Derýalyk» ugry boýunça türkmen gazynyň dünýä bazaryna çykarylmagy ugrunda hem-de ýurdumyzyň demirgazyk welaýatynyň ilatynyň gymmatly «mawy ýangyç» bilen ýokary derejede üpjün edilmegi babatda nusgalyk işleri alyp barýarlar.


165dc6a2670a92.jpeg
Türkmenistanda habar beriş serişdeleriniň sanlylaşdyrylmagy täze mümkinçilikleri açýar

Ählumumy sanlylaşdyrma we internet asyry täze habar beriş serişdeleriniň döremegi üçin mümkinçilikleri açmak bilen çäklenmän, eýsem, sanly ulgamdan peýdalanýan okyjylaryň täze neslini kemala getirdi. Olar üçin maglumatlaryň esasy çeşmesi bolup metbugat sahypasy däl-de, kompýuteriň, planşetiň ýa-da smartfonyň multimedia ekrany hyzmat edýär.

165c31806f1f62.jpeg
Magtymguly Pyragynyň kanoniki portretiniň döreýşi

Döwlet şekillendiriş sungaty muzeýiniň zallarynyň birini Türkmenistanyň halk suratkeşi Aýhan Hajyýewiň döreden beýik şahyrymyz Magtymguly Pyragynyň kanoniki portreti bezeýär. Bu portret Magtymgulynyň keşbiniň hut şeýle bolandygyna ynamymyzy berkitdi. Ýogsa, eseriň döredilen wagty suratkeş bary-ýogy 23 ýaşynda eken, ol şonda-da fotosuraty bolmadyk şahyryň keşbini şekillendirmäge ýaýdanmandyr. A.Hajyýewiň ýerine ýetirmeginde Magtymgulynyň asyl keşbiniň emele gelşine düşünmek üçin bu eseriň döreýşiniň taryhyny ýatlamagy makul bildik.


165953ddc0ebdf.jpeg
Sergeý Lazarew joşgunly türkmen tomaşaçysynyň öňünde dyza çökdi (Arhiwdan 2014 ýyl)

Rus estradasynyň ýyldyzy Sergeý Lazarewiň Sportuň gyşky görnüşleri boýunça sport toplumynda guralan çykyşy diýseň uly şowhun döredip, tomaşaçylaryň müňlerçesinde gyzyklanma döretdi.