Bagtly çagalyk — döwlet syýasatynyň ileri tutulýan ugry
Hormatly Prezidentimiz Gurbanguly Berdimuhamedowyň Kararyna laýyklykda, Türkmenistanda Howandarlyga mätäç çagalara hemaýat etmek boýunça haýyr-sahawat gaznasy döredildi. Döwlet Baştutanymyz bu haýyr-sahawat gaznasyna ilkinji bolup öz gazanjyndan serişde goýdy. Täze döredilen gaznanyň serişdeleri şol çagalaryň tölegli saglyk, bilim hyzmatlaryndan peýdalanmaklary, mynasyp dynç almaklary we beýleki zerurlyklary üçin gönükdiriler.
Milli Liderimiziň bu asylly başlangyjy nebitgaz toplumynyň işgärleri, ähli türkmenistanlylar tarapyndan doly goldanyldy. Türkmenistanyň Merkezi bankynda Gurbanguly Berdimuhamedow adyndaky Howandarlyga mätäç çagalara hemaýat etmek boýunça haýyr-sahawat gaznasynyň hasaby açyldy (390101101).
Gurbanguly Berdimuhamedow adyndaky Howandarlyga mätäç çagalara hemaýat etmek boýunça haýyr-sahawat gaznasynyň hasaplarynyň belgileri
milli manatda — 23205934110100100000000;
amerikan dollarynda — 23205840110100200000000;
ýewroda — 23205978110100300000000.
Döwletmyrat PIRLIÝEW, «Türkmengaz» döwlet konserniniň Geologiýa we gaz ýataklaryny işläp geçmek müdirliginiň başlygynyň orunbasary:
— Hormatly Prezidentimiziň syýasaty milli ruhy gymmatlyklara we umumadamzat maksatlaryna esaslanandyr. Milli Liderimiziň Howandarlyga mätäç çagalara hemaýat etmek boýunça haýyr-sahawat gaznasyny döretmek hakynda asylly başlangyjy munuň ýene bir subutnamasy bolup durýar.
Şunuň bilen baglylykda, döwlet Baştutanymyz akyldar şahyrymyz Magtymguly Pyragynyň şeýle setirlerini mysal getirdi:
«Ýetimi göreňde, güler ýüz bergil,
Goldan gelse, oňa tagam-duz bergil,
Bir gamly göreňde, şirin söz bergil,
Entäni goldara hemaýat ýagşy».
Milli Liderimiziň belleýşi ýaly, bagtly adamlar köp, ýöne gynansak-da, durmuşda kim ejiz bolýar, ýene biri bolsa, ene-atanyň mährinden ir galyp, durmuşyň ajysyny datmaly bolýar. Ata-babalarymyz özüniň malyndan, halal gazanjyndan bir sebäp bilen başyny alada aldyran, güni güzaply geçýän adamlar ýa-da ýetim çagalar üçin aýryp goýmagy-da däbe öwrüpdirler. Şeýle etmek bilen olaryň aladasyny, agyr gussasyny, azajyk hem bolsa, egismäge çalşypdyrlar.
Täze haýyr-sahawat gaznasy ene-ata mährinden ir galan çagalara ýardam etmekde uly orun eýelär. Bu başlangyç ýurdumyzyň ýaş raýatlarynda zähmete söýgi, bilime höwes döretmekde, ruhy-ahlak gymmatlyklaryny kemala getirmekde, çagalaryň we ýaşlaryň hukuklarynyň hem-de azatlyklarynyň goralmagyny kepillendirmekde uly ähmiýete eýe bolar.
Akmyrat AMANOW, «Türkmennebit» döwlet konserniniň Kärdeşler arkalaşygynyň komitetiniň başlygy:
— Türkmenistanda jemgyýetiň we döwletiň iň ýokary gymmatlygy adamdyr. Bu ýurdumyzyň Konstitusiýasynda berkidilip, hormatly Prezidentimiziň baştutanlygynda üstünlikli durmuşa geçirilýän giň gerimli durmuş-ykdysady maksatnamalarda öz beýanyny tapýar.
Ýaşlara terbiýe bermek — bu örän möhüm wezipe. Hut çagalykdan başlap şahsyýetiň esasy aýratynlyklary, ruhy-ahlak gymmatlyklary, zähmete söýgi we maksada okgunlylyk ýaly häsiýetler kemala getirilýär. Olar, ozaly bilen, maşgalada önüp-ösüp, çaga söýgini, üns-aladany duýýarlar, başgalaryň dertli gününde derdini, begenen gününde şatlygyny paýlaşmagy, özi hem-de ýakynlary üçin jogapkärçilik çekmegi öwrenýärler, köp zady bilmäge çalyşýarlar.
Ene-atanyň mährinden ir galan çagalar hakynda aladany döwletimiz öz üstüne alyp, olaryň uly we bagtly maşgala bolup, üns-alada bilen gurşalandygyny duýup ýaşamagy üçin ähli şertleri döredýär. Milli Liderimiziň başlangyjy bilen döredilen haýyr-sahawat gaznasy ilatyň has ejiz gatlagyna goldaw bermek çäresi bolmak bilen çäklenmän, eýsem, türkmen halkynyň asylly ynsanperwer ýörelgeleriniň dowamy bolup durýar.
Aýna GURBANOWA, «Türkmengeologiýa» döwlet korporasiýasynyň iş ýöredijisi:
— Ösüp gelýän nesil barada hemmetaraplaýyn alada hormatly Prezidentimiziň alyp barýan döwlet syýasatynyň möhüm ugry bolup durýar. Bu syýasatyň esasynda türkmen halkynyň ynsanperwer gymmatlyklary, ruhy däpleri durýar.
Çagalar — eziz Watanymyzyň geljegi. Bu gün ýurdumyzda çagalaryň bagtly durmuşyny üpjün etmek, ýaşlaryň mynasyp bilim-terbiýe almagy, bedenterbiýe we sport, aýdym-saz, edebi-çeper döredijilik bilen meşgullanmagy üçin ähli şertler döredildi.
Berkarar Watanymyzy has-da ösdürmäge, halkymyzyň durmuş derejesini ýokarlandyrmaga gönükdirilen köpugurly işleri üçin milli Liderimize nebitgaz senagatynyň işgärleriniň adyndan tüýs ýürekden çykýan hoşallyk sözlerini beýan etmek isleýärin. Biz Gurbanguly Berdimuhamedow adyndaky Howandarlyga mätäç çagalara hemaýat etmek boýunça haýyr-sahawat gaznasyny döretmek hakynda asylly başlangyjy doly goldaýarys.
Ozon gatlagyny goramagyň halkara güni mynasybetli makala ýazmak boýunça bäsleşik yglan edilýär!
«Ýaş tebigatçy» jemgyýetçilik guramasy Türkmenistanyň Daşky gurşawy goramak ministrliginiň ýanyndaky Ozon merkezi bilen bilelikde ýurdumyzyň orta mekdeplerinde bilim alýan 10-12-nji synp okuwçylarynyň hem-de talyp ýaşlaryň arasynda makala ýazmak bäsleşigini yglan edýär.
Balkanabat nebitçilik orta hünär okuw mekdebi sanly tehnologiýalary ornaşdyrýar
«Türkmennebit» döwlet konserniniň Balkanabat nebitçilik orta hünär okuw mekdebi nebitgaz pudagy üçin ýokary taýýarlykly hünärmenleri taýýarlamak maksady bilen sanly infrastrukturasyny ösdürýär. Ýurdumyzda sanly bilim ulgamyny ösdürmegiň Konsepsiýasynyň çäklerinde okuw işine balkanabatnohom.edu.tm resmi saýty arkaly Moodle platformasy, «eTalyp» programmasy, elektron kitaphana, şeýle hem elektron resminama dolanyşygy we hasaba alyş ulgamlary girizildi.
Berkarar döwletiň talyplarynyň köňül kelamy
Ýurdumyzda ýylyň-ýylyna täze ylym-bilim ojaklary gurlup ulanylmaga berilýär. «Garaşsyz, baky Bitarap Türkmenistan — bedew batly at-myradyň mekany» ýylynda hem täze ýokary okuw mekdepleri, umumybilim berýän orta okuw mekdepleri ulanylmaga berildi. Munuň özi bu ugurda alnyp barylýan işleriň depgininiň barha ilerleýändigini görkezýär. Şu ýyl hem arzuwlary myrat tapyp, ýokary okuwa giren ýaşlar örän köpdür. Olaryň arasynda Ýagşygeldi Kakaýew adyndaky Halkara nebit we gaz uniwersitetine täze okuw ýylynda talyplyga kabul edilen ýaşlar hem az däl.
«Nebit-gaz» gazetiniň 15 ýyllygy dabaraly bellenildi
«Nebitgaz» gazetiniň redaksiýasynda neşiriň ilkinji sanynyň çap edilip başlanmagynyň 15 ýyllygyna bagyşlanan dabaraly çäre geçirildi. Oňa “Türkmengaz” we “Türkmennebit” döwlet konsernleriniň, Türkmenistanyň Nebitgaz senagaty toplumynyň işgärleriniň kärdeşler arkalaşygynyň Geňeşiniň wekilleri, şeýle hem redaksiýanyň işgärleri gatnaşdylar.
«Ýaş tebigatçy» jemgyýetçilik guramasy intellektual bäsleşige çagyrýar!
16-njy sentýabrda sagat 14:00-da «Arkaç» SÖMerkeziniň «Iş nokady» koworking merkezinde «Ýaş tebigatçy» jemgyýetçilik guramasy Türkmenistanyň Daşky gurşawy goramak ministrliginiň ýanyndaky Ozon merkezi bilen bilelikde Halkaara ozon gatlagyny goramak gününe bagyşlanan intellektual bäsleşik geçirýär.
