Habarlar

«Türkmenistanyň nebiti we gazy — 2023» atly XXVIII halkara maslahata we sergä gatnaşyjylara

https://ussatnews.com/storage/posts/6209/original-16538de23d3a68.jpeg

Hormatly halkara maslahata we sergä gatnaşyjylar!

Sizi Arkadag Serdarly bagtyýar ýaşlar ýylynda gözel paýtagtymyzda geçirilýän «Türkmenistanyň nebiti we gazy — 2023» atly XXVIII halkara maslahatyň we serginiň öz işine başlamagy bilen tüýs ýürekden gutlaýaryn.

Her ýyl guralýan «Türkmenistanyň nebiti we gazy» atly pudaklaýyn sergi hem-de maslahat ýurdumyzyň nebitgaz pudagynyň kärhanalary bilen daşary ýurt kompaniýalarynyň arasynda hyzmatdaşlygyň ösdürilmegine uly itergi berýär. Bu forumyň ýurdumyzyň hünärmenleri üçin öz mümkinçiliklerini görkezmekde hem-de hyzmatdaşlary tapmakda oňat şertleri döretjekdigine ynanýaryn.

Berkarar döwletiň täze eýýamynyň Galkynyşy döwründe Garaşsyz, hemişelik Bitarap Türkmenistan özüniň tebigy baýlyklaryny türkmen halkynyň, şeýle-de beýleki sebitleriň halklarynyň bähbidine gönükdirmäge çalyşýar we bu babatda netijeli işleri amala aşyrýar. Dünýäde uglewodorod serişdeleriniň gorlary boýunça öňdäki orunlary eýeleýän ýurdumyzyň nebitgaz pudagynyň önümçiliklerine ylmyň soňky gazanan tehnologiýalaryny, enjamlaryny ornaşdyrmak hem-de nebitgaz senagatynda ekologik howpsuzlygy üpjün etmek esasy talap bolup durýar.

Ýokary derejede geçirilýän halkara forum daşary ýurtly gatnaşyjylary ýurdumyzyň ýangyç-energetika toplumyny ösdürmegiň strategiýasy, döwrebap tehnologiýalary işjeň çekmegiň tejribesi, hyzmatlary amala aşyrmagyň ýollaryny we ulgamyny mundan beýläk-de döwrebaplaşdyrmagyň usullary bilen tanyşdyrar. Ol bu ugurda işleýän hünärmenleriň arasynda uly gyzyklanma döreder. Şeýle duşuşyklar özara gatnaşyklaryň has netijeli ýollaryny gözlemekde, göni gepleşikleri geçirmekde möhümdir. Netijeli gepleşikler bolsa Türkmenistanyň baý ýangyç-energetika serişdelerini özleşdirmäge we rejeli ulanmaga gönükdirilen täze bilelikdäki taslamalara ýol açýar.

Eziz watandaşlar!

Hormatly myhmanlar!

Türkmenistan häzirki wagtda «mawy ýangyjy» Hytaý Halk Respublikasy, Russiýa Federasiýasy, Azerbaýjan Respublikasy, Özbegistan Respublikasy ýaly döwletlere eksport edýär. Türkmen tebigy gazyny Aziýanyň günorta-gündogaryna eltjek, sebitiň iri taslamasy bolan Türkmenistan — Owganystan — Pakistan — Hindistan gaz geçirijisiniň gurluşygynda daşary ýurtly işewürlere hyzmatdaşlyk etmäge uly mümkinçilikler bardyr. Bu gaz geçirijiniň gurluşygynyň amala aşyrylmagy sebitiň ähli döwletleriniň ykdysadyýetiniň pugtalanmagyna oňaýly täsirini ýetirer. Hazarüsti gaz geçirijisi hem türkmen tebigy gazyny Ýewropa döwletlerine çykarmakda geljegi uly iri taslamalaryň hatarynda durýar.

Halkara bazaryň türkmen tebigy gazyna bolan islegini kanagatlandyrmakda gory boýunça dünýäde öňdäki orunlaryň birini eýeleýän «Galkynyş» gaz känine aýratyn orun degişlidir. «Galkynyş» gaz känini tapgyrlaýyn özleşdirmek işleriniň giň gerimde alnyp barylýandygyny, bu işlere maýa goýumlary çekmekde ýurdumyzda ýokary derejede amatly şertleriň döredilýändigini aýratyn nygtamak gerek. Türkmenistan tebigy gazy diňe bir eksport etmegiň mümkinçilikleri bilen çäklenmän, ony gaýtadan işlemäge hem uly ähmiýet berýär. Bu ugurda-da ýurdumyz özara bähbitli hyzmatdaşlyk üçin açykdyr.

Hormatly halkara foruma gatnaşyjylar!

Häzirki wagtda senagat ähmiýetli nebit gorlary bolan täze gatlaklary gözläp tapmak we «gara altyn» känlerini özleşdirip, önümçilige girizmek işleri ýurdumyzyň dürli künjeklerinde giň gerimde alnyp barylýar. Bu babatda «gara altynyň» mekany bolan günbatar Türkmenistanda hem-de onuň çäklerindäki gojaman Hazaryň deňiz ýalpaklygynda gözleg, barlag, buraw işleri geçirilýär. Bu ugurda daşary ýurt kompaniýalary bilen hyzmatdaşlygyň gerimi barha giňeýär.

Ýurdumyzda nebithimiýa senagaty hem çalt depginde ösdürilýär. Türkmenbaşydaky nebiti gaýtadan işleýän zawodlar toplumynyň önümçilik kuwwatynyň barha ýokarlanýandygyny hem-de bu ýerde öndürilýän nebit önümleriniň görnüşiniň has-da artýandygyny muňa mysal getirmek bolar. Gaýtadan işleýän senagaty döwrebap derejede ösdürmek, bu ulgama halkara tejribäni giňden ornaşdyrmak, dünýä belli haryt nyşanly önümleriň bilelikdäki önümçiligini ýola goýmak işleri hem üns merkezinde saklanýar.

Hormatly halkara maslahata we sergä gatnaşyjylar!

Gadyrly myhmanlar!

Bu halkara maslahatyň we serginiň geçirilmegi bilen, özara bähbitli ykdysady hyzmatdaşlygy pugtalandyrmakda ýene-de bir möhüm ädim ädiler. Diňe çig maly eksport etmek bilen çäklenmän, gaýtadan işleýän senagaty ösdürýän Türkmenistanyň ak şäheri Aşgabatda guralan nebitgaz forumynyň hyzmatdaşlaryň sanyny artdyrjakdygyna we hyzmatdaşlygy pugtalandyrjakdygyna berk ynanýaryn. Sizi 28-nji gezek geçirilýän «Türkmenistanyň nebiti we gazy — 2023» atly halkara maslahatyň we serginiň öz işine başlamagy bilen ýene-de bir gezek tüýs ýürekden gutlaýaryn. Siziň ähliňize berk jan saglyk, rowaçlyk, halkara maslahatyň we serginiň işine bolsa üstünlik arzuw edýärin.

Türkmenistanyň Prezidenti

Serdar Berdimuhamedow.

Başga habarlar
16af5860cde284.jpeg
Gahryman Arkadag: Türkmenistan ekologiýa taýdan arassa tehnologiýalary giňden ornaşdyrmagy ugur edinýär

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow 11-nji noýabrda Antalýada Birleşen Milletler Guramasynyň Howanyň üýtgemegi baradaky Çarçuwaly konwensiýasyna gatnaşyjy taraplaryň 31-nji maslahatynyň (COP31) Liderler sammitiniň plenar mejlisinde çykyş etdi.


16af40f5b47663.jpeg
Türkmenistan Er-Riýadda geçiriljek «Ekspo-2030» Bütindünýä sergisine gatnaşjakdygyny tassyklady

Türkmenistanyň Saud Arabystany Patyşalygyndaky ilçisi Muhammetgeldi Aýazowyň «Expo 2030 Riyadh» halkara gatnaşyjylar departamentiniň müdiri, Türkmenistanyň geljekki Bütindünýä sergisindäki ýurt menejeri Muhammed bin Garad bilen duşuşygynda «Ekspo-2030» Bütindünýä sergisine gatnaşmaga taýýarlyk meseleleri ara alnyp maslahatlaşyldy. Bu barada «Türkmenistan: Altyn asyr» neşiri habar berýär.


16af2b34039863.jpeg
Türkmenistan Pakistanyň metbugat wekillerine energetika ulgamyndaky hyzmatdaşlygy barada gürrüň berdi

6-njy noýabrda Türkmenistanyň Pakistan Yslam Respublikasyndaky ilçihanasynyň binasynda Päkistanyň köpçülikleýin habar beriş serişdeleriniň wekilleri üçin brifing geçirildi.

16aeeff6683cc6.jpeg
Şanhaýda türkmen-hytaý işewürler forumy geçirilýär

6-7-nji noýabrda Şanhaýda türkmen-hytaý işewürlik forumy geçirilýär. Onuň üns merkezinde nebitgaz we himiýa senagaty, gurluşyk, ulag logistikasy, oba hojalygy we sanly tehnologiýalar ugurlary boýunça hyzmatdaşlyk durýar.


16aeefcbcbce55.png
Şanhaýda geçirilýän Hytaýyň 9-njy halkara import sergisinde Türkmenistanyň milli pawilýony açyldy

Şanhaýda (HHR) 5-nji noýabrda Hytaýyň 9-njy halkara import sergisi (CIIE 2026) açyldy, ol 10-njy noýabra çenli dowam eder. Türkmenistan forumda ýurduň Söwda-senagat edarasy bilen "Oguz Forum we Ekspo" ýapyk görnüşli paýdarlar jemgyýetiniň bilelikde guran Milli pawilýony bilen wekilçilik edýär.