Ussat ýazyjy Hojanepes Meläýewiň ýiti galamyndan çykan «Tylla teňňeler», «Düýnki gelinler», «Daň ýyldyzy», «Garagumuň bürgütleri», «Durmuş dowamaty», «Aşyk oglan», «Ynsan keşbi» ýaly kitaplary öz döwründe okyjylar tarapyndan gyzgyn garşylandy. Golaýda ýazyjynyň maşgalasy, halypa žurnalist Kümüş Meläýewa bilen söhbetdeş bolanymyzda, ol şeýle gürrüň berdi:

- Hojanepes 1941-nji ýylda Daşoguz welaýatynyň Görogly etrabynyň häzirki Ýagtylyk geňeşliginde dünýä inýär. Onuň bilen bir mekdepde okamsoň, biri-birimizi çagalyk ýyllarymyzdan tanaýardyk. Eýýäm şol ýyllarda edebiýata bolan ukyby bilen ol deň-duşlaryndan tapawutlanýardy. Oňa mekdebimiziň diwar gazetini çykarmak ynanylypdy. Ol gazetiň her sanynyň gyzykly bolmagy üçin alada ederdi. Kämahal gazetde dünýä edebiýatynyň gömükli wekilleri Aleksandr Dýumanyň, Şandor Petefiniň eserleriniň ýaşlara degişli böleklerini ýerleşdirerdi. Şol bölekleri mugallymlarymyz, synpdaşlarymyz durup-durup okardylar.

Hojanepes mekdebi tamamlap, häzirki Magtymguly adyndaky Türkmen döwlet uniwersitetiniň türkmen dili we edebiýaty fakultetine okuwa girdi. Talyplyk ýyllary hem edebiýat bilen içgin gyzyklanýardy. Dördünji ýyl talyby wagty ony oňat okaýan talyplar bilen Beýik Britaniýa gezelenje iberdiler. Gezelençden gelenden soň «Iňlis zenany Maurin» atly hekaýasyny ýazdy. Bu hekaýasy üçin oňa kiçijik baýragam berdiler. Şol döwür- de ol «Altynyň ýesiri», «Güller yranýardylar», «Düýnki gelinler» ýaly powestleridir hekaýalaryny ýazdy.

Hojanepes az sözli, işjanly adamdy. Hemişe öz geljekki eserleriniň ýordumy, gahrymanlarynyň başdan geçirýän ruhy ahwallary bilen ýaşardy. Taýyn eden eserleriniň golýazmalalaryny täzeden göçürmek onuň üçin adaty endige öwrülipdi. «Garagumuň bürgütleri» atly powestini ýazan mahaly eseriň gahrymanlarynyň durmuşyny içgin öwrenmek üçin gazçylaryň arasynda bir aýlap ýaşady. Muhammet şanyň ogly Jelaleddiniň ömri we durmuşy barada gürrüň berýän «Şazadanyň ýaşlygy» atly powestiniň üstün- de işlän wagtlary Hindistanda döredijilik saparynda boldy. Bu eser okyjylara gowşandan soň dünýä inen agtygymyza «Jelaleddin ýaly edermen bolsun» diýip, onuň adyny dakdy. Ynsanyň ruhy-ahlak gymmatlyklary bilen bagly tema onuň bütin döredijiliginiň içinden eriş-argaç bolup geçýär. Hojanepesiň eserleriniň köpüsi doganlyk halklaryň dillerine terjime edildi. «Garagumuň bürgütleri» atly powesti-hä ýapon diline-de ter¬jime edildi.

Hojanepes dramaturg hökmünde-de giňden tanaldy. «Mollaoraz», «Aýperiniň aýdymy», «Ýalyn», «Durdy Gylyç» ýaly pýesalary ýurdumyzyň teatrlarynda sahnalaşdyryldy. Onuň ýazan eserlerini bagtyýar döwrümiziň ýaşlary höwes bilen okaýarlar.

Biz 1963-nji ýylda durmuş gurup, otuz dört ýyl süýjülikde ýaşaşdyk. Maşgalamyzda iki çagany kemala getirdik. Olar ylymly-bilimli adamlar bolup ýetişdiler. Men Seýitnazar Seýdi adyndaky Türkmen döwlet mugallymçylyk institutynyň fizika-matematika fakultetini tamamlap, Aşgabatdaky Aman Kekilow adyndaky Mugallymçylyk mekdebinde mugallym bolup işledim. Hojanepesiň edebiýata bolan yhlasy ömrümi žurnalistika baglamagyma sebäp boldy.

Maşgalamyzyň adyndan milli edebiýatymyzy ösdürmäge goşant goşan ýazyjy-şahyrlaryň edebi mirasyny öwrenmäge giň mümkinçilikleri döredýän Gahryman Arkadagymyza, Arkadagly Gahryman Serdarymyza hoşallyk bildirýärin.

Ýazga geçiren Meretgylyç ÝAGMYROW,

«Edebiýat we sungat».