Aýlaryň serweri bolan mübärek Oraza aýynda külli musulman dünýäsinde bolşy ýaly, türkmen halkymyz hem agyz bekläp, Diýarymyzyň gülläp ösmegi üçin ýagşy doga-dilegler edýär. Ynsan haýyr işiň başyny başlamakçy bolsa, sähetli ýa-da ýatda galyjy günleri saýlaýar. Remezan aýynyň her bir güni şeýle pursatlara baýdyr. Agyz beklemek ýa-da oraza tutmak musulmanlaryň esasy parzlarynyň biridir. Oraza döwründe birek-biregiň göwnüne degmekden daş durup, her kime eliňden gelen ýagşylygy gaýgyrmaly däldir. Oraza adama özüne erk etmekligi, gündelik durmuşdaky işlerini belli bir düzgüne salmaklygy hem öwredýär.

Biziň her birimiz çagalyk ýyllarymyzda dünýäniň şowhunyna goşulyşyp, ýaremezan baradaky sanawajy aýdyp görendiris. Ynha, “Türkmenistan- parahatçylygyň we ynanyşmagyň Watany” diýlip atlandyrylan şu ýylda hem mübärek Oraza aýynyň öňýanynda çagalaryň «Ýaremezanlary» aýdyp, öýlere aýlanmagy bilen her bir döwletli maşgalanyň gapysy kakyldy. Şeýdibem ýagşy niýetler, gözel pursatlar, ak arzuwlar kalplara şatlyk paýlady. Bu aý ýagty ertirlere bolan ynamymyzy artdyrýar, agzybirligimizi berkidýär.

Baýmyrat SAPAROW,

Türkmen döwlet binagärlik - gurluşyk institutynyň talyby.