23-nji sentýabrda paýtagtymyzdaky Maslahat köşgünde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde geçirilen Türkmenistanyň Halk Maslahatynyň mejlisi giň gerimli özgertmeleriň netijelerini jemledi hem-de ýurdumyzy durmuş-ykdysady we senagat taýdan ösdürmegiň möhüm wezipelerini kesgitledi.

Halk Maslahatynyň Başlygy Gahryman Arkadagymyzyň hem-de hormatly Prezidentimiz Serdar Berdimuhamedowyň çykyşlarynda beýan edilen döwlet syýasatynyň esasy ugurlarynyň hatarynda milli ykdysadyýetimiziň kerwenbaşysy –— ýangyç-energetika toplumyna möhüm orun berildi.

Döwlet Baştutanymyzyň maksada okgunly syýasatynyň netijesinde ýangyç-energetika toplumynda zähmet öndürijiligini ýokarlandyrmak üçin ähli şertler döredildi. Kärhanalarda dünýäniň öňdebaryjy önüm öndürijileriniň sanly tehnologiýalary we innowasion enjamlar işjeň ornaşdyrylýar, ekologiýa abadançylygynyň hem-de zähmeti goramagyň standartlary berjaý edilýär.

Döwletimiz şol bir wagtda ýokary hünär derejeli işgärleriň taýýarlanylmagyna hem-de ýangyç-energetika toplumynyň işgärleriniň ýaşaýyş-durmuş şertleriniň yzygiderli gowulandyrylmagyna aýratyn üns berýär. Döwlet Baştutanymyzyň pudagyň zerurlyklaryna yzygiderli üns bermegi, energetika pudagynyň hünärmenleriniň işine ýokary baha bermegi olarda röwşen geljege bolan ynamy berkidýär hem-de eziz Watanymyzyň rowaçlygynyň hatyrasyna täze sepgitleri eýelemäge kuwwatly itergi berýär we işe bolan höwesini has-da artdyrýar.

Halk Maslahatynyň Başlygy Gurbanguly Berdimuhamedow öz taryhy çykyşynda ägirt uly «Galkynyş» gaz käniniň strategik ähmiýetini aýratyn belledi. Bu ägirt uly gaz käniniň tapgyrlaýyn özleşdirilmegi tebigy gazyň ýurduň içine hem-de halkara bazarlara ygtybarly we durnukly iberilmegini üpjün etmäge mümkinçilik berýär. «Galkynyş» gaz käniniň özleşdirilmeginiň dördünji tapgyryna badalga berilmegi şanly waka öwrüldi. Täze düzümleýin desgalaryň gurulmagy ýylda goşmaça 10 milliard kub metr harytlyk gazy gaýtadan işlemäge mümkinçilik berer. Bu taslamanyň durmuşa geçirilmegi ýurdumyzyň eksport mümkinçiliklerini artdyrmak bilen çäklenmän, eýsem, ýüzlerçe täze iş orunlaryny döretmäge ýardam eder.

Transmilli başlangyçlara, şol sanda Türkmenistan — Owganystan — Pakistan — Hindistan gaz geçirijisiniň (TOPH) gurluşygyna aýratyn orun berildi. Taslamanyň «Arkadagyň ak ýoly» diýlip atlandyrylýan Serhetabat — Hyrat bölegi möhüm ähmiýete eýe bolup, ol ýurdumyzyň parahatçylykly we döredijilikli daşary syýasy ugrunyň nyşany bolup çykyş edýär.

Şol bir wagtda gaýtadan işleýän kuwwatlyklar artdyrylýar: Türkmenbaşydaky nebiti gaýtadan işleýän zawodlar toplumynda täze desgalar gurulýar we Seýdiniň nebiti gaýtadan işleýän zawody döwrebaplaşdyrylýar.

“Türkmenistanda amala aşyrylýan özgertmeler ýurdumyzy öňdebaryjy senagat we ýokary tehnologiýaly önümçilik merkezine öwürmäge gönükdirilendir” diýip, hormatly Prezidentimiz Serdar Berdimuhamedow belledi.

Halk Maslahatynyň belent münberinden nebitgaz pudagynyň işine ýokary bahanyň berilmegi «Türkmengaz», «Türkmennebit» döwlet konsernleriniň hem-de «Türkmengeologiýa» döwlet korporasiýasynyň işgärleri tarapyndan çuňňur hoşallyk we buýsanç duýgusy bilen kabul edildi. Pudagyň işgärleri Gahryman Arkadagymyzyň hem-de Arkadagly Gahryman Serdarymyzyň yzygiderli aladasyna tutanýerli zähmet çekmek we öňde goýlan wezipeleri üstünlikli ýerine ýetirmek bilen jogap bermäge taýýardyklaryny beýan etdiler. Şol işleriň hatarynda täze ýataklary özleşdirmek, çig malyň düýpli gaýtadan işlenilýän möçberini artdyrmak, innowasiýalary ornaşdyrmak, “ýaşyl” ykdysadyýete geçmek we zyňyndylary azaltmak ýaly wezipeler bar.

Halk Maslahatynyň mejlisiniň jemleri Türkmenistanyň nebitgaz pudagynyň geljege ynamly seredip, halkymyzyň abadançylygynyň we özygtyýarly Watanymyzyň ykdysady kuwwatynyň esasy kepili bolup galýandygyny tassyklady.

Ussa USSAÝEW,

«Nebit-gaz» gazetiniň baş redaktory.