Mukaddes Garaşsyzlygymyzyň şanly 35 ýyllygyna hem-de «Garaşsyz, baky Bitarap Türkmenistan — bedew batly at-myradyň mekany» diýen şygar astynda geçýän ýylyň hormatyna Türkmenistanyň Döwlet medeniýet merkeziniň Mukamlar köşgünde ýokary guramaçylyk derejesinde geçirilen dabaraly mejlis medeniýet we sungat işgärlerini, jemgyýetçiligiň wekillerini bir ýere jemläp, ýurdumyzda täze ruhubelentlik we döredijilik badalgalaryny döretdi.

Giň gerimli forum türkmen halkynyň Milli Lideri Gahryman Arkadagymyz tarapyndan başy başlanan, häzirki döwürde bolsa hormatly Prezidentimiz Arkadagly Gahryman Serdarymyzyň baştutanlygynda üstünlikli durmuşa geçirilýän döwlet syýasatynyň dabaralanýandygyny aýdyň görkezdi. Çäräniň esasy maksady milli däp-dessurlarymyzyň baýlygyny, behişdi ahalteke bedewleriniň şan-şöhratyny hem-de sungatyň güýji bilen Garaşsyz Watanymyzyň gazanan ägirt uly üstünliklerini şöhlelendirmekden ybarat boldy. Gahryman Arkadagymyzyň we Arkadagly Gahryman Serdarymyzyň durmuşa geçirýän beýik işlerinden ruhlanýan ähli ministrlikleriň, pudak edaralaryň hem-de kärhanalaryň hünärmenleri Garaşsyzlygymyzyň şanly 35 ýyllyk baýramçylygyny uly zähmet üstünlikleri bilen garşylamaga taýýarlyk görýärler.

Bu şanly senäniň Türkmenistanyň nebitgaz toplumy tarapyndan diňe bir ýokary önümçilik görkezijileri bilen däl, eýsem, uly döredijilik ruhy bilen hem garşy alynýandygyny buýsanç bilen bellemek isleýäris. Şu günler nebitçilerimiz, gazçylarymyz we geologlarymyz Garaşsyzlygymyzyň şanly 35 ýyllygyny täze zähmet ýeňişleri bilen garşylamagy maksat edinip, Watanymyzyň ykdysady kuwwatyny has-da berkitmäge mynasyp goşant goşýarlar.

Redaksiýamyzyň esasy wezipesi bu taryhy ähmiýetli wakalaryň jümmüşinde bolup, olary öz wagtynda giňden beýan etmekden ybaratdyr. Gazetimiziň döredijilik topary ýurdumyzyň ýangyç-energetika toplumynyň gazanýan üstünliklerini dessin we hemmetaraplaýyn beýan etmek babatda giň mümkinçiliklerden netijeli peýdalanýar. Bu üstünlikleriň beýany diňe bir gazetimiziň çap görnüşinde däl, eýsem, halkara sanly giňişlikde hem türkmen, rus we iňlis dillerinde neşir edilýän elektron neşir arkaly giň okyjylar köpçüligine ýetirilýär.

Mukaddes Garaşsyzlygymyzyň şanly 35 ýyllygy halkymyzyň ruhubelentliginiň baýramydyr. Şu mynasybetli geçiriljek dabaralaryň medeni maksatnamasynyň taýýarlanylmagynda pudaklaýyn döredijilik merkezleri aýratyn möhüm orun eýeleýär. Häzirki günlerde «Türkmengaz» döwlet konserniniň Medeni-işewürlik merkezi, «Türkmennebit» döwlet konserniniň Saparmyrat Türkmenbaşy adyndaky Nebitçileriň medeniýet köşgi, Türkmenbaşydaky nebiti gaýtadan işleýän zawodlar toplumynyň Medeni-sport toplumy, «Türkmengaz» DK-nyň «Marygazçykaryş» müdirliginiň Durmuş taýdan dolandyryş edarasynyň Şatlyk şäherindäki Medeniýet köşgi uly yhlas bilen döredijilik işlerini alyp barýarlar.

Estrada aýdymçylarymyz, folklor we tans toparlarymyz, bagşy-sazandalarymyz Watanymyzyň şan-şöhratyny, halkymyzyň bagtyýar durmuşyny hem-de dünýä meşhur ahalteke bedewleriniň gözelligini wasp edýän täze aýdym-saz eserlerini we konsert maksatnamalaryny taýýarlaýarlar. Olaryň döredijilik eserleri diňe bir nebitgaz pudagynyň işgärlerini däl, eýsem, ýurdumyzyň ähli raýatlaryny täze üstünliklere, döredijilikli zähmete ruhlandyrýar.

Forumyň jemleýji pursady hökmünde meşhur estrada ussatlarynyň hem-de ähli gatnaşyjylaryň bilelikde ýerine ýetiren «Öňe, öňe, diňe öňe, jan Watanym Türkmenistan!» aýdymy türkmen halkynyň jebisliginiň, agzybirliginiň we beýik maksatlara bolan ygrarlylygynyň kuwwatly senasy bolup ýaňlandy.

Ýangyç-energetika toplumynyň pudaklaýyn metbugatynyň wekilleri we medeniýet işgärleri üçin bu ýyl ylhamlara baý we ruhubelent döwürdir. Türkmenistanyň mukaddes Garaşsyzlygynyň şanly 35 ýyllygyny mynasyp garşylamak, ýurdumyzyň gazanýan beýik üstünliklerini giňden wagyz etmek ugrunda ähli bilimimizi, tejribämizi we döredijilikli işimizi gaýgyrman zähmet çekeris.

Ussa Ussaýew,

«Nebit-gaz» gazetiniň baş redaktory .