«Daşoguzgazakdyryş» müdirliginiň «Gazawat» senagat meýdançasynyň energosuwüpjünçilik gullugynyň işçi-hünärmenleri häzirki gyş günlerinde müdirligiň merkezi dolandyryş edarasyna degişli desgalaryň ýyladyş ulgamlarynyň talabalaýyk işlemegini üpjün edýärler. Munuň özi müdirligiň merkezi dolandyryş edarasyna we «Gazawat» senagat meýdançasyna degişli zähmet köpçüliklerinde alnyp barylýan derwaýys işleriň sazlaşykly gitmegini hem-de ol ýerlerde işleýän zähmet adamlarynyň amatly iş orunlarynda işlemegini şertlendirýär. Müdirligiň degişli hünärmenleri şular ýaly amatlyklaryň «Döwletabat — Derýalyk» ugry boýunça baş gaz geçirijisiniň ugrunda ýerleşýän «Şatlyk», «Garagum», «Çöllük», «Ýylanly» we «Derýalyk» ýaly önümçilik edaralarynyň ählisinde-de döredilendigini gürrüň berýärler.

Mälim bolşy ýaly, müdirligiň garamagyndaky «Döwletabat — Derýalyk» iri gaz magistraly ýurdumyzyň gündogarynda ýerleşýän gäz känlerinden alynýan gymmatly «mawy ýangyjy» Diýarymyzyň demirgazygynda ýerleşýän böleginiň ilatyna ýetirmekde we Ýewropa ugry boýunça dünýä bazaryna çykarmakda möhüm ähmiýetli gaz geçirijileriň biridir. Munuň şeýledigine düşünýän müdirligiň düzümine girýän edara-kärhanalaryň, şol sanda «Gazawat» senagat meýdançasynyň işçi-hünärmenleri gaz akdyryjy, gaz gysyjy hem-de gaz paýlaýjy desgalar bilen bir hatarda, dolandyryş we önümçilik binalarynyň ýyladyş ulgamlaryny gyş möwsümine taýýarlamakda hem ýylyň başyndan bäri giň göwrümli işleri durmuşa geçirdiler. Biziň bu ugurda «Gazawat» senagat meýdançasynyň energosuwüpjünçilik gullugynyň başlygy Durmuş Kakaýew bilen başlanan söhbetdeşligimiziň dowamy olaryň häzirki döwürde alyp barýan gündelik wajyp işleri baradaky gürrüňlere ulaşdy.

— Şu ýyl gyş pasly öňki ýyllardakydan has sowuk geldi. Munuň özi gazçylaryň jogapkärçiligini has-da artdyrýar. Biz howanyň sowuk döwri bolan güýz-gyş möwsümine taýýarlyk işlerine ir girişdik. Gyşa taýýarlyk işleri ýylyň başyndan bäri müdirligimiziň merkezi dolandyryş edarasyndan we «Gazawat» senagat meýdançasyndan başga-da, onuň düzümine girýän Ýöriteleşdirilen ulanyş, Merkezi ýyladyş elektrotehniki önümçilik, Jemleýji we üpjün ediji tehniki önümçilik hem-de Awtoulaglar edaralarynda, şeýle hem «Döwletabat — Derýalyk» baş gaz geçirijisiniň ugrunda ýerleşýän gaz gysyjy desgalarda hem meýilnamalaýyn esasda guramaçylykly alnyp baryldy. Degişli hünärmenler tarapyndan binalaryň ýyladyş ulgamlary doly gözden geçirilip, zerur bolan ýerlerinde düýpli abatlaýyş we dikeldiş işleri geçirildi. Netijede, bir tarapdan, ýyladyş ulgamlarynyň saz işlemegi gazanylan bolsa, ikinji bir tarapdan, müdirligimiziň edara-kärhanalarynda zähmet çekýän adamlaryň amatly hem-de howpsuz iş şertlerinde, ýyly we ýagty iş orunlarynda işlemeklerine giň mümkinçilikler döredildi.

Tamamlanyp barýan ýylymyzda ýyladyş maksatly desgalary gyş möwsümine taýýarlamakda öwgä mynasyp işleri ýerine ýetiren abatlaýyş-dikeldiş işleriniň slesarlary Orazbaý Orazow, Rafkat Bakirow, elektrik ussasy Faýzylla Atajanow, elektrik we gaz bilen kebşirleýji Azizbek Jumanyýazow we «Komatsu» kysymly toprak gazyjy ekskawatoryň sürüjisi Kadambaý Allamow dagynyň atlaryny buýsanç bilen tutmak bolar. Olaryň birleşen tagallalary netijesinde müdirligiň merkezi dolandyryş edarasyna degişli binalaryň we desgalaryň ýyladyş ulgamlaryna barýan gaz geçirijiler, içi suwly ulgamlar hem-de suw gazanlary düýpli abatlanyp, işleýiş mümkinçilikleri ep-esli artdyryldy — diýip, D.Kakaýew aýdýar.

Dädebaý NARTYÝEW,

Ussatnews.com.