Türkmen wekiliýetiniň 22-23-nji ýanwarda Ýaponiýa amala aşyran iş saparynyň barşynda resminamalaryň, şol sanda ýangyç-energetika toplumynda bilelikdäki taslamalary durmuşa geçirmek boýunça resminamalaryň birnäçesine gol çekildi.

Wise-premýer, Türkmenistanyň daşary işler ministri Reşid Meredow hem-de Ýaponiýanyň ykdysadyýet, söwda we senagat ministri Ken Saýto Türkmenistanyň we Ýaponiýanyň arasynda baglaşylan Energetika geçmek hakynda ähtnama gol çekdiler.

Resminama laýyklykda taraplar energiýany tygşytlama, energiýanyň dikeldilýän çeşmeleri, wodorod, ammiak, elektroýangyç, uglerody tutmak, ulanmak we saklamak, metanyň syzmagyna garşy çäreleri görmek, elektrik energiýasyny öndürmegiň ýokary netijeli tehnologiýalary ýaly ugurlar boýunça gatnaşyklary ösdürmegi maksat edinýärler. Taraplar Türkmenistanyň ýangyç-energetika toplumynda önümçilik işleri geçirilende parnik gazlarynyň zyňyndylaryny azaltmaga ýardam edýän tehnologiýalar babatda özara gatnaşyklary ýola goýmak barada ylalaşdylar. Şeýlelikde, iki ýurduň dekarbonizasiýa (energiýanyň pes uglerodly çeşmelerine esaslanan ykdysadyýet) babatda hyzmatdaşlyk etmegi üçin esas döredildi.

Şeýle hem Türkmenistanyň Ahal welaýatynda Tebigy gazdan benzin öndürýän zawodyň Ikinji Toplumynyň taslamasyny işläp taýýarlamagy we gurup ulanmaga bermegi göz öňünde tutýan resminama gol çekildi, ol uglewodorodlar gazylyp alynanda metanyň howa zyňylýan mukdaryny azaltmak üçin tehnologiýalaryň ornaşdyrylmagyna ýardam eder.

Ken Saýtonyň belleýşi ýaly, uglerod bitaraplygyny gazanmakda Merkezi Aziýanyň orny barha artýar. Duşuşygyň dowamynda nygtalyşy ýaly, Ýaponiýanyň ykdysadyýet, söwda we senagat ministrligi Merkezi Aziýanyň ýurtlary, şol sanda Türkmenistan bilen uglerodsyzlandyryjy tehnologiýalar babatda hyzmatdaşlygy işjeňleşdirmegi meýilleşdirýär.

Ýaponiýada geçirilen iş duşuşyklary Global metan borçnamasyny amala aşyrmakda möhüm ädime öwrülip, olarda ýangyç-energetika toplumy babatda arassa tehnologiýalary ösdürmekde özara gatnaşyklar bilen bagly meseleler gozgaldy. Türkmenistanyň Prezidenti Serdar Berdimuhamedow Dubaýda geçirilen COP28 sammitinde çykyş edip, biziň ýurdumyzyň şol borçnama goşulýanlygyny resmi taýdan beýan etdi.

Ýeri gelende ýatlatsak, ýangyç-energetika toplumynda energetika sektorynyň kärhanalaryny tehniki taýdan enjamlaşdyrmak, innowasion we energotygşytlaýjy tehnologiýalary ornaşdyrmak, şeýle hem bar bolan infrastrukturany täzelemek we ýokary hilli hyzmat etmek, täzesiniň taslamasyny işläp düzmek boýunça işler geçirilýär. Energiýa serişdeleri gazylyp çykarylanda ekologiýa töwekgelçilikleri azaltmak, önümçilige netijeli gorag tehnologiýalaryny ornaşdyrmak boýunça işlere, halkara hyzmatdaşlygyna, öňdebaryjy dünýä tejribesini ornaşdyrmaga aýratyn ähmiýet berilýär. Ýaponiýada geçirilen duşuşyklar ýurdumyzyň şol ugurlarda hyzmatdaşlygy has-da giňeltmäge we işjeňleşdirmäge taýýardygyny tassyklaýar.