Gahryman Arkadagymyz Türkmenistanyň Prezidentini Bilimler we talyp ýaşlar güni mynasybetli gutlady
Çuňňur hormatlanylýan Türkmenistanyň Prezidenti!
Sizi bereketli güýz paslynyň ilkinji gününde bellenilýän Bilimler we talyp ýaşlar güni mynasybetli Türkmenistanyň Halk Maslahatynyň adyndan tüýs ýürekden gutlaýaryn. Siziň janyňyzyň sag, ömrüňiziň uzak bolmagyny, ata Watanymyzy gülledip ösdürmekde, halkymyzyň, ylaýta-da, ýaşlaryň bagtyýar durmuşda ýaşamagy, döwrebap ylym-bilim almagy, zähmet çekmegi ugrunda alyp barýan işleriňizde üstünlikleri arzuw edýärin.
Hormatly Prezidentimiz!
Siziň «Watan diňe halky bilen Watandyr! Döwlet diňe halky bilen döwletdir!» diýen ýörelgäňiz esasynda Berkarar döwletiň täze eýýamynyň Galkynyşy döwründe ýokary depginlerde sazlaşykly ösýän ýurdumyzda döwlet syýasatynyň möhüm ugry hökmünde milli bilim ulgamyny kämilleşdirmäge aýratyn ähmiýet berilýär. Siziň Kararyňyz bilen tassyklanan «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy» esasynda bilim ulgamy milli ýörelgelerimize, dünýä ülňülerine, umumy ykrar edilen halkara kadalara we öňdebaryjy tejribelere laýyklykda yzygiderli ösdürilýär. Ýaş nesillerimizi milli hem-de umumadamzat gymmatlyklarynyň ruhunda terbiýelemek, olara döwrebap bilim bermek babatda maksatnamalaýyn işler üstünlikli dowam etdirilýär. Türkmen ýaşlary özlerini Garaşsyz Watanymyza, il-günümize wepaly, zähmetsöýer, ýokary ahlakly nesiller hökmünde tanadyp, sportda, medeniýetde, ylym-bilimde uly ýeňişleri gazanyp, döwletimiziň abraý-mertebesini belende göterýärler.
Belent mertebeli Prezidentimiz!
Siziň tagallalaryňyz bilen «Pähim-paýhas ummany Magtymguly Pyragy» ýylynyň altyn güýzünde ýurdumyzyň dürli sebitlerinde orta mekdepleriň, çagalar baglarynyň onlarçasynyň açylyp ulanmaga berilmegi bilim özgertmeleriniň üstünliklere beslenýändigini, ýaş nesilleriň bilimli, giň dünýägaraýyşly bolmaklary üçin giň mümkinçilikleriň döredilýändigini görkezýär. 1-nji synpa barýan okuwçylara noutbuk kompýuterleriniň sowgat berilmegi bolsa ýurdumyzda ýaş nesil barada döwlet derejesinde alada edilýändiginiň aýdyň beýanydyr.
Siziň baştutanlygyňyzda gurluşygynyň ikinji tapgyry ýokary depginde dowam edýän, sebitde deňi-taýy bolmadyk Arkadag şäherinde hem döwrebap bilim ojaklarynyň ençemesiniň bina edilmegi röwşen geljegimiz bolan ýaşlar hakyndaky aladanyň çuňňur manysynyň bardygyny alamatlandyrýar. Bu ýerde Aba Annaýew adyndaky Halkara atçylyk akademiýasynyň, dürli orta hünär okuw mekdepleriniň, çagalar bagyny öz içine alýan okuw-terbiýeçilik toplumynyň, mekdepleriň, çagalar baglarynyň bolmagy ýaş nesilleriň döwrebap şertlerde terbiýelenmegi, ylym-bilim almagy ugrunda edilýän aladalaryň anyk mysalydyr.
Sarpasy belent Prezidentimiz!
«Bilim hakynda» Türkmenistanyň Kanunynyň rejelenen görnüşiniň, «Ýaşlar barada döwlet syýasaty hakynda» Türkmenistanyň Kanunynyň, «Türkmenistanda çaganyň irki ösüşini we mekdebe taýýarlygyny ösdürmek babatda 2020 — 2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasynyň» kabul edilmegi, şeýle-de kabul edilen beýleki kanunçylyk namalary esasynda ýaşlary döwrebap şertlerde okatmak, olara milli ýörelgelerimiziň, taryhy şahslarymyzyň mysalynda edep-terbiýe bermek, ukyp-başarnyklaryny ýüze çykarmak we ösdürmek ugrunda giň gerimli işler üstünlikli alnyp barylýar.
Siziň baştutanlygyňyzda täze taryhy döwrümizde bilim ulgamyna dünýä standartlaryny yzygiderli ornaşdyrýan ýurdumyz ynsanperwer ugur boýunça Birleşen Milletler Guramasy we onuň ýöriteleşdirilen düzümleri, Ýewropa Bileleşigi bilen özara gatnaşyklary ösdürýär. Bilim ulgamynda dünýäniň oňyn tejribesi işjeň öwrenilýär, daşary ýurtlaryň bilim, ylmy merkezleri bilen hyzmatdaşlygyň gerimi giňeldilýär. Ylmyň we tehnologiýanyň häzirki barha ösýän döwründe bilim özgertmelerini çaltlandyrmak, onuň netijeliligini ýokarlandyrmak, öňdebaryjy ýaşlaryň hatarynda orun aljak nesilleri terbiýelemek mugallymlaryň we bilim işgärleriniň möhüm wezipesi bolup durýar.
Hormatly Prezidentimiz!
Sizi «Pähim-paýhas ummany Magtymguly Pyragy» ýylynda giňden bellenilýän Bilimler we talyp ýaşlar güni mynasybetli Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli başlangyçlaryňyz mundan beýläk-de rowaç bolsun!
Sizi hormatlamak bilen,
Türkmen halkynyň Milli Lideri,
Türkmenistanyň Halk Maslahatynyň Başlygy,
Gahryman Arkadag Gurbanguly Berdimuhamedow.
Ozon gatlagyny goramagyň halkara güni mynasybetli makala ýazmak boýunça bäsleşik yglan edilýär!
«Ýaş tebigatçy» jemgyýetçilik guramasy Türkmenistanyň Daşky gurşawy goramak ministrliginiň ýanyndaky Ozon merkezi bilen bilelikde ýurdumyzyň orta mekdeplerinde bilim alýan 10-12-nji synp okuwçylarynyň hem-de talyp ýaşlaryň arasynda makala ýazmak bäsleşigini yglan edýär.
Balkanabat nebitçilik orta hünär okuw mekdebi sanly tehnologiýalary ornaşdyrýar
«Türkmennebit» döwlet konserniniň Balkanabat nebitçilik orta hünär okuw mekdebi nebitgaz pudagy üçin ýokary taýýarlykly hünärmenleri taýýarlamak maksady bilen sanly infrastrukturasyny ösdürýär. Ýurdumyzda sanly bilim ulgamyny ösdürmegiň Konsepsiýasynyň çäklerinde okuw işine balkanabatnohom.edu.tm resmi saýty arkaly Moodle platformasy, «eTalyp» programmasy, elektron kitaphana, şeýle hem elektron resminama dolanyşygy we hasaba alyş ulgamlary girizildi.
Berkarar döwletiň talyplarynyň köňül kelamy
Ýurdumyzda ýylyň-ýylyna täze ylym-bilim ojaklary gurlup ulanylmaga berilýär. «Garaşsyz, baky Bitarap Türkmenistan — bedew batly at-myradyň mekany» ýylynda hem täze ýokary okuw mekdepleri, umumybilim berýän orta okuw mekdepleri ulanylmaga berildi. Munuň özi bu ugurda alnyp barylýan işleriň depgininiň barha ilerleýändigini görkezýär. Şu ýyl hem arzuwlary myrat tapyp, ýokary okuwa giren ýaşlar örän köpdür. Olaryň arasynda Ýagşygeldi Kakaýew adyndaky Halkara nebit we gaz uniwersitetine täze okuw ýylynda talyplyga kabul edilen ýaşlar hem az däl.
«Nebit-gaz» gazetiniň 15 ýyllygy dabaraly bellenildi
«Nebitgaz» gazetiniň redaksiýasynda neşiriň ilkinji sanynyň çap edilip başlanmagynyň 15 ýyllygyna bagyşlanan dabaraly çäre geçirildi. Oňa “Türkmengaz” we “Türkmennebit” döwlet konsernleriniň, Türkmenistanyň Nebitgaz senagaty toplumynyň işgärleriniň kärdeşler arkalaşygynyň Geňeşiniň wekilleri, şeýle hem redaksiýanyň işgärleri gatnaşdylar.
«Ýaş tebigatçy» jemgyýetçilik guramasy intellektual bäsleşige çagyrýar!
16-njy sentýabrda sagat 14:00-da «Arkaç» SÖMerkeziniň «Iş nokady» koworking merkezinde «Ýaş tebigatçy» jemgyýetçilik guramasy Türkmenistanyň Daşky gurşawy goramak ministrliginiň ýanyndaky Ozon merkezi bilen bilelikde Halkaara ozon gatlagyny goramak gününe bagyşlanan intellektual bäsleşik geçirýär.
