Täze guýydan tebigy gazyň senagat akymy alyndy
«Türkmengeologiýa» döwlet korporasiýasynyň «Lebapnebitgazgözleg» ekspedisiýasynyň baýlyk gözleýjileriniň Täçmyradow meýdançasynda burawlan guýusyndan tebigy gazyň senagat akymy alyndy. Munuň özi ekspedisiýanyň agzybir hünärmenleriniň ýetip gelýän beýik baýrama — Türkmenistanyň Garaşsyzlygynyň şanly 33 ýyllygyna ajaýyp toý sowgady boldy.
— Öňki ýyllarda geçirilen deslapky barlaglaryň netijelerine laýyklykda, Çärjew etrabynyň çäginde, Malaý gaz känine golaý ýerde ýerleşýän bu meýdançada tebigy gazyň uly gorlarynyň bardygy çaklanylýardy. Bu ýerde gözleg guýusyny burawlamak işi tejribeli buraw ussalary Işanguly Mämmetgulyýew bilen Döwlet Babagulyýewiň ýolbaşçylyk edýän toparlarynyň agzalaryna ynanyldy. Olar tarapyndan şu döwre çenli 2 müň 500 metr çuňluk burawlandy we önümli gatlaga ýetildi. Täze guýynyň önüm berijiligi her gije-gündizde kükürtsiz tebigy gazyň 389 müň kub metrine barabardyr. Geljekde bu meýdançada gözleg guýularyny burawlamak işleri dowam etdiriler — diýip, ekspedisiýanyň geologiýa bölüminiň başlygy Batyr Akmyradow ynam bilen aýdýar.
Gazanylan uly üstünlikde toparlaryň agzalarynyň her biriniň mynasyp zähmet paýy bar. Olaryň arasynda tejribeli burawlaýjylar Anwar Çaryýew, Merdan Hemraýew, burawlaýjynyň kömekçileri Ylýas Bekiýew, Seýitmyrat Mämedow, maşinist Çary Allakow, slesar Suwhanberdi Taňryberdiýew has tapawutlanyp zähmet çekdiler. Olaryň göreldesine kärdeşleri agzybirlik bilen eýerýärler. Netijede, il-ýurt bähbitli işler ilerleýär.
Hormatly Prezidentimiz ýurdumyzyň ykdysadyýetinde möhüm orny eýeleýän nebitgaz toplumyny ileri tutup ösdürmek, uglewodorod serişdeleriniň gorlarynyň üstüni ýetirmek we olaryň öndürilişini artdyrmak boýunça möhüm wezipeleri kesgitledi. Şoňa laýyklykda, ýerlerde anyk we maksatlaýyn işler giňden ýaýbaňlandyrylýar. Şu ýylyň başynda «Türkmengaz» döwlet konserni bilen «Türkmengeologiýa» döwlet korporasiýasyna degişli kükürtsiz gaz känlerinde gözleg-barlag, ulanyş-baha beriş guýularyny burawlamak boýunça 2024-nji ýyl üçin iş meýilnamasy kabul edilipdi. Şanly ýylyň başyndan onuň çäginde degişli işlere giň gerim berildi.
Häzirki günlerde ýokarda ady agzalan meýilnama laýyklykda, Çartak, Kölýaka, Tebigy, Demirgazyk Köseşor, Hazarly meýdançalarynda hem burawlaýyş işleri alnyp barylýar. Bilelikde ýerine ýetirilýän işleriň mynasyp netijelerini berýändigi bolsa guwandyryjydyr. Oňa mysal hökmünde Çartak käninde taslama çuňlugy 2 müň 450 metre barabar bolan ulanyş-baha beriş guýusyndan tebigy gazyň senagat akymynyň alnandygyny görkezmek bolar. Nesip bolsa, şanly ýylyň aýagyna çenli täze burawlanan guýulardan tebigy gazyň senagat akymynyň alnandygy baradaky hoş habarlaryň sany ýene-de artar. Işanguly Mämmetgulyýewiň we Döwlet Babagulyýewiň ýolbaşçylyk edýän toparlarynyň agzybir agzalary bolsa Täçmyradow meýdançasynda ýene bir gözleg guýusyny burawlamaga girişdiler.
Parnik gazlarynyň zyňyndylaryna gözegçilik etmekde okuw sapaklary
Ählumumy metan borçnamasyndan gelip çykýan şertleri ýerine ýetirmek maksady bilen, «Türkmengaz» döwlet konserniniň Ylmy-barlag tebigy gaz institutynyň daş-töweregi goramak bölüminiň gurnamagynda institutyň Maglumat-seljeriş merkezinde parnik gazlarynyň zyňyndylaryna emeli hemra arkaly gözegçilik etmek üçin ösen tehnologiýalara degişli ugurlar boýunça monitoring etmek we olaryň üstünde takyklyga baha bermek, maglumatlary werifikasiýa etmek we başga-da degişli ugurlarda iş alyp barmaklygyň halkara usullaryna degişli wideoaragatnaşyk arkaly onlaýn okuw sapaklary geçirildi.
Gazçylar Garaşsyzlygymyzyň toýuna zähmet üstünlikleri bilen barýarlar
Ýurdumyzda nebitgaz senagatyny döwrebap derejede ösdürmek, tebigy baýlyklarymyzy halkymyzyň we Watanymyzyň bähbidine netijeli peýdalanmak ugrunda giň gerimli işler durmuşa geçirilýär. Bu möhüm wezipeleriň üstünlikli amala aşyrylmagyna «Türkmengaz» döwlet konserniniň «Lebapgazçykaryş» müdirliginiň agzybir işgärleri hem mynasyp goşant goşýarlar.
Türkmen nakgaşynyň eserleri Azerbaýjandaky halkara festiwalynda uly abraýa eýe boldy
29-njy iýul — 3-nji awgust aralygynda Azerbaýjan Respublikasynyň Gabala şäherinde geçirilen «GabalaFest» festiwalynyň çäklerinde «Medeniýetleriň çatrygy» atly ilkinji halkara sungat sergisi guraldy. Dünýäniň 30-dan gowrak döwletiniň sungat ussatlaryny bir ýere jemlän bu taslama suratkeşlik, heýkeltaraşlyk we fotosurat arkaly dürli medeniýetleriň hem-de nesilleriň arasynda çeper dialogy ösdürmäge gönükdirildi.
Gökderede ýangyn-amaly sporty boýunça nobatdaky bäsleşik geçirildi
7-nji awgustda Gökdere jülgesinde ýerleşýän «Çynar» çagalar sagaldyş we dynç alyş merkezinde ýangyn-amaly sporty boýunça bäsleşik geçirildi. Bäsleşige bu ajaýyp künjekde dynç alýan ýetginjeklerden ybarat ýaş ýangyn söndürijileriň 14 topary gatnaşdy.
Döwrebap işler bitirilýär
Ýurdumyzyň günbatar sebitindäki hazynaly ýataklardan uglewodorod çig mallaryny gözläp tapmagy «Türkmennebit» döwlet konserniniň «Türkmennebitgeofizika» müdirliginiň hünärmenleriniň irginsiz we netijeli zähmetinden aýrybaşga göz öňüne getirmek kyndyr.
