Temmäki adam tarapyndan ulanylýan iň zyýanly madda bolup durýar. Onuň ulanylmagy saglyk üçin howpludyr.

Lukmanlaryň aýtmaklaryna görä, çilimiň düzümindäki nikotin gana goşulyp, bronh, damar, öýken, düwnük, ýürek, bagyr we nerw ulgamlarynyň dürli keselleriniň döremegine alyp barýar. Mundan başga-da çilimkeşlik zyýanly endige öwrülip, adama ruhy taýdan zeper ýetirýär. Şonuň üçinem, gowusy, bu endige ulaşmazlykdyr. Ýöne durmuşda saý-sebäp bilen çilimi köp ýyllaryň dowamynda çeken adam, lukman bilen maslahatlaşyp, onuň kömegi bilen bu närseden el çekip biler.

Çilim çekmek saglyga, bedene zyýan ýetirmekdir. Bu madda adamyň işjeňligini peseldýär, çalasyn hereketlere ukypsyz edýär. Çilimkeşiň çekýän temmäkisiniň tüssesi onuň ýanyndaky adamlar üçin has-da zyýanlydyr. Ol ylaýta-da çagalaryň boýunyň ösüşine, ýatkeşligine zyýanly täsirini ýetirýär.

Gahryman Arkadagymyzyň Berkarar döwletimiziň bagtyýarlyk döwründe mähriban diýarymyzyň her bir gününi bagtyýarlyga öwürmek, jemgyýetimizde sagdyn durmuş ýörelgeleriniň kada-kanunlaryny has-da berkitmek, zyýanly endikleri aradan aýyrmak üçin edýän aladalary özüniň oňyn netijesini berýär.

Türkmenistan döwletimiziň ähli ýerlerinde çilimkeşlige garşy göreş çäresi ilatyň arasynda wagyz-ündew işleri ýokary derejede geçirilýär.

Saglygy goraýyş işgärleri hem ulus-ilimiz bilen bir hatarda özleriniň hyzmat edýän çäklerinde söhbetdeşlikler, düşündirişler, wagyz-nesihat işlerini geçirýärler.

Sona ILMUHAMMEDOWA,

Aşgabat şäheriniň 4-nji Saglyk öýüniň şepagat uýasy.