Çigit - birýyllyk günebakaryň tohumy bolup, ol ýag öndürmek we iýmit üçin ulanylýar. Bu tohumlaryň uzynlygy 10-15 mm, ini bolsa 7-8 mm bolýar. Arassalanan çigitleriň 100 gram möçberinde ýaglar 49.57 gr, uglewodlar 18.76 gr, beloklar 22.78 we suw 1.21 gr mukdarda saklanýar. Günebakar çigitleriniň bedeniň saglygyny goramakda peýdaly aýratynlyklary bar, ýöne muňa garamazdan olary köp mukdarda yzygiderli ulanmak maslahat berilmeýär.

Çigidiň 100 gramynda takmynan 584 kaloriýa bar. Şeýlelikde, 100 gram çigidi iýmitlik hökmünde ulanmak bilen biz gündelik zerur bolan peýdaly elementlerden 130 % witamin E, 35 % witamin B3, 70 % witamin B5, 40 % witamin B6, 113% selen, 39 % belok, 115 % fosfor, 35 % sink, 24 % kaliý, 32 % magniý, 21 % demir gazanyp bileris. E we B witaminleriniň köp mukdarda bolmagy saçyň, dyrnaklaryň we deriň ýagdaýyny gowulandyrmakda ähmiýetlidir.

Hünärmenler çigitde bedeniň öýjükleriniň garramak hadysalaryny haýalladýan, iýmit çalyşygyny gowulandyrýan antioksidantlaryň saklanýandygyny belleýärler. Günebakar tohumy holesteriniň derejesini peseldýär we doýgun däl ýag kislotalary arkaly bedendäki gana oňaýly täsir edýär. Şeýle-de bolsa, tohumlary aşa köp iýmek bedende omega-6 derejesiniň ýokarlanmagyna we ýürek-damar keselleriniň döremek howpuna sebäp bolup biler.

Çigidiň kabul ediliş mukdary gündelik 50-100 gramdan artyk bolmaly däl. Elbetde, her bir bedeniň özboluşly aýratynlyklary bolany üçin lukman bilen maslahatlaşmak ýerlikli bolar. Şeýle-de, lukmanlar çigidi gowrulan däl-de, çyg görnüşde iýmegi maslahat berýär.

Muhammet MUHAMMEDOW,

Türkmen döwlet binagärlik-gurluşyk institutynyň talyby.