Şirin owazly aýdymçy Döwletmämmet GURBANOW
«Türkmennebit» döwlet konserniniň Nebitçiler medeniýet köşgünde Watanymyzyň ösüşli menzilleriniň waspyny ýetirmekde döwrebap işler alnyp barylýar. Medeniýet, sungat işgärleri kalbynda hoşallyk, ruhubelentlik duýgusyny goşalandyryp, döwrüň sesine ses goşup, öz döredijiliklerinde milli mirasymyzy wasp etmeklige uly orun berýärler, döwrebap derejede ösdürmeklige öz mynasyp goşantlaryny goşýarlar. Olaryň biri Türkmenistanyň at gazanan artisti Döwletmämmet GURBANOW.
– Döwletmämmet, aýdym-saz köňüllere ganat berýär, durmuşyň gözelligini artdyrýar. Gürrüňimiziň başyny şu sungatyň gözelligi baradaky söhbetden başlaýaly.
– Hawa, aýdym, saz – täsinliklerden doly dünýä. Meniň üçin aýdym adamlaryň kalbyna gozgalaň salyp bilýän, şygyr bilen sazyň nikasyndan dörän täsin bir gudrat. Ol ynsan ruhunyň başga bir zat bilen öwezi dolunmajak höregi. Aýdym adamlaryň göwün syrdaşyna deňelýär. Kalbyna ýakyn aýdymy-sazy hiç kim biparh diňläp bilmeýär. Olary ýerine ýetiren ussatlar halkyň aňynda hemişelik orun tapýar. Hut şonuň üçinem Gahryman Arkadagymyz «Ile döwlet geler bolsa...», «Türkmen medeniýeti» atly kitaplarynda aýdym-saz sungatyna, olaryň nesilden-nesle şol şirinligi, datlylygy bilen geçmeginde uly işler bitiren ussatlara hemişe ýokary baha berýär, mertebeleýär.
2015-nji ýylda Gahryman Arkadagymyzyň sahawaty bilen Türkmenistanyň at gazanan artisti diýen hormatly adyň eýesi boldum. Bu at meni has-da döredijilikli işlemäge, täze-täze aýdymlaryň gözleginde bolmaga borçly edýär.
– Her bir ýoluň başlangyjy bolýar. Sizi bu sungata getiren ýoluň gözbaşlaryna nazar aýlaýsak?
– Çagalygymdan halk aýdym-sazlarynyň aşygy. Bereket etrabynyň gum içindäki Burgun obasynda, orta mekdepde okap ýören ýyllarym döredijilik gurnagyna gatnardym. Gurnak ýolbaşçymyz Amangeldi Ýylanlyýew halk aýdym-sazlaryna bolan söýgime çyn halypanyň guwançly nazary bilen garap, uly goldaw berdi. 1993-nji ýylda meni Bereket etrap medeniýet bölümine işe çagyrdylar. 1997-nji ýylda bolsa Balkanabat şäherindäki «Şapak» medeniýet merkezinde işläp başladym. Şol ýyl «Ýaňlan, Diýarym!» telebäsleşiginiň jemleýji tapgyryna gatnaşdym. 2013-nji ýyldan bäri «Türkmennebit» döwlet konserniniň Nebitçiler medeniýet köşgüniň «Dehistan» aýdym-tans we folklor-etnografiýa toparynyň halk saz gurallary bölüminde çykyş edýärin.
Türkmenistanyň halk artisti Nurberdi Gulowy ruhy halypam hasaplaýaryn. Nurberdi halypa döredijiligi bilen bagşyçylygyň çopan ýoluny ösdürdi. Meniň aýdymlarymyň hem aglabasy hut, şol ýola degişli. Ondan başga-da, Magtymguly Garlyýewiň, Aşyrmämmet Dawudowyň, Saryhan Sapaýewiň, Molla Çäkliýewiň ýerine ýetiren halk aýdymlaryny höwes bilen aýdýaryn.
Kärdeşlerim, gyjakçym Baýramdurdy Söýünow, ussat zehinler Altyn Goşaýewa, Amangül Gurbanowa, Ýazmyrat Orazberdiýew bilen hemişe ýakyn aragatnaşyk saklaýaryn. Olar maňa hemişe degerli maslahatlaryny berip durýarlar. Meniň iki oglum bar. Kiçi oglum bagşyçylyga höwesjeň.
– Döwletmämmet, Gahryman Arkadagymyz medeniýet we sungat işgärleriniň kämilleşmegine, olaryň öz ussatlyklaryny dünýä ýaýmaklaryna uly mümkinçilikler döredýär. Muňa Türkmenistanyň daşary ýurtlarda geçirilýän medeniýet günleri hem doly şaýatlyk edýär. Size-de öz sungatyňyz bilen daşary ýurtlarda birnäçe gezek çykyş etmek miýesser boldy.
– Gahryman Arkadagymyzyň türkmen medeniýetini dünýä ýaýmakda döredip berýän giň mümkinçilikleri kalbymyzy buýsanja besleýär. «Dehistan» toparymyz bilen Belarus Respublikasynda, Hytaýda, Italiýada, Şweýsariýada döredijilik saparlarynda bolup geldik. Daşary ýurtly tomaşaçylar, diňleýjiler biziň milli aýdym-sazlarymyza, tanslarymyza, küştdepdimize uly gyzyklanma bilen tomaşa edýärler. Ine, şunuň özi bizi täze-täze döredijilik üstünliklerine ruhlandyrýar.
– Geljekki maksatlaryňyz barada-da gürrüň edäýeli?
– Elbetde, her bir döredijilik adamsy kalbynda uly-uly maksatlar besläp döredýär, zähmet çekýär. Berkarar döwletimiziň bagtyýarlyk döwrüniň medeniýet, sungat işgärleriniň baş maksady Watanymyzyň waspyny ýetirmek. Hut häzirki günlerde biz mukaddes Garaşsyzlygymyzyň 30 ýyllygynyň şanyna täze aýdymlary döretmek bilen meşgullanýarys. Bu şanly seneň her bir gününi öz aýdym-sazlarymyz bilen bezemek – baş maksadym. Kalbymyzda şeýle uly ynamy, joşguny kemala getiren Gahryman Arkadagymyzyň jany sag, belent başy aman, il-ýurt bähbitli, dünýä ähmiýetli işleri rowaç bolsun!
Hojaberdi BAÝRAMOW,
USSAT NEWS.
Maýa goýum syýasaty — Türkmenistanyň durnukly ösüşiniň mäkäm binýady
Türkmenistanyň yzygiderli we öňdengörüjilikli maýa goýum syýasaty durnukly durmuş-ykdysady ösüşiň hem-de halkyň hal-ýagdaýynyň ýokarlanmagynyň möhüm şerti bolup durýar.
Watanymyz — bagtymyz, buýsanjymyz
Watanyňy söýmek — ýurduňa, halkyňa, medeniýetiňe we taryhyňa çuňňur buýsanç hem-de wepalylyk duýgusydyr. Ol diňe bir çuňňur duýgy bolman, eýsem, Watanyňa gulluk etmäge, göbek ganyň daman topragyny goramaga, ýurduň rowaçlygy, halkyň abadançylygy ugrunda yhlasyňy gaýgyrman zähmet çekmäge taýýar bolmakda jemlenýän borçdur.
Türkmenistanyň sanly mediasy — milli KHBS-niň ösüşinde möhüm faktor
Häzirki zaman dünýäsinde sanly köpçülikleýin habar beriş serişdeleri jemgyýetçilik ösüşiniň iň möhüm bölekleriniň birine öwrülýär. Türkmenistanda bu ugra döwlet derejesinde aýratyn ähmiýeti berilýär, sebäbi sanly media milli bitewüligi pugtalandyrmakda, parahatçylyk, ylalaşyk we ynsanperwerlik ideýalaryny wagyz etmekde, şeýle hem ýurduň oňyn halkara abraýyny kemala getirmekde möhüm orny eýeleýär.
Garaşsyz, baky bitarap Türkmenistan — bagtyýarlygyň we rowaçlygyň ýurdy
Hoşniýetlilik hemişe adamyň özünden, onuň oý-pikirlerinden, edim-gylymlaryndan we röwşen geljege bolan ynamyndan gözbaş alýar. Adamlaryň döredijilige ymtylýan ýerinde, parahatçylyga, zähmete we özara hormata gadyr goýýan ýerinde belent maksatlar rowaçlanýar.
Derweze krateri babatda türkmen alymlarynyň toplan tejribesi
Gündogar we Merkezi Türkmenistanyň gaz ýataklaryny özleşdirmek babatda taslama we ylmy işleri amala aşyrmak «Türkmengaz» döwlet konserniniň Ylmy-barlag tebigy gaz institutynyň işiniň esasy ugurlarynyň biri bolup durýar.
