Miweler ynsan saglygy üçin möhüm iýmit hasaplanýar. Şolaryň arasynda almanyň peýdaly taraplaryna bolsa uly ähmiýet berilýär. Süýji tagamly, ýakymly ysy bilen tapawutlanýan alma witaminlere, minerallara örän baýdyr. Onuň düzüminde organiki turşulyklar, şeker, glýukoza, fruktoza, efir ýaglary, A, K, C, E, B6 witamini, kletçatka, pektin maddalary, mineral duzlar (demir, marganes, kaliý, natriý, kalsiý), fitonsidler we beýleki maddalar bar.

Alymlaryň geçiren barlaglarynyň netijesinde almanyň ýürek-damar kesellerine we bedenimiziň daşky ýaramaz täsirlerden goranmak ukybynyň güýçlenmegine täsiriniň uludygy ýüze çykaryldy. Şeýle-de alma nerw ulgamynyň näsazlygy zerarly bolýan huşsuzlyk, gürlemek kynçylygy, hereketiň agyrlaşmagy ýaly ýagdaýlaryň öňüni almakda peýdaly hasaplanýar. Şonuň üçin-de fiziki we aň taýdan agyr zähmet çekýän adamlara günüň dowamynda alma iýmek maslahat berilýär. Alma iýmit siňdiriş ulgamyny, gandaky şekeriň mukdarynyň deňagramlygyny kadalaşdyrýar, süňkleriň berkligini üpjün edýär.

Alymlaryň geçiren barlaglarynyň netijesine görä, orta ýaşdaky adamlaryň günde iki sany alma iýmegi olarda holesteriniň umumy düzüminiň ortaça 3,6 göterim peselendigini görkezdi. Şeýle-de, yzygiderli berhizde almanyň damarlaryň ýagdaýyny gowulandyrýandygy anyklanyldy.

Alma dürli iýmitleri, işdäaçarlary taýýarlamakda, halk tebipçiliginde giňden ulanylýar. Bilşimiz ýaly, bu miwe iň gadymy ekinleriň biri hasaplanýar. Arheologlaryň maglumatlaryna görä, alma agajy b.e.ö VII asyrda ösdürilip ýetişdirilipdir.  

Taýýarlan Aýsoltan ORAZMUHAMMEDOWA,

Türkmen döwlet binagärlik-gurluşyk institutynyň talyby.